سۋ جانە يرريگاسيا مينيسترلىگىنە قاراستى باسسەيندىك ينسپەكسيالار ەل اۋماعىنداعى 1502 گيدروتەحنيكالىق قۇرىلىسقا جان-جاقتى تەكسەرىس جۇرگىزدى، دەپ حابارلايدى Dalanews.kz.
سۋ رەسۋرستارىن رەتتەۋ، قورعاۋ جانە پايدالانۋ كوميتەتى ءتوراعاسىنىڭ مىندەتىن اتقارۋشى گۇلميرا يماشيەۆانىڭ سوزىنشە، تەكسەرىس ناتيجەسىندە انىقتالعان ولقىلىقتاردى جويۋعا قاتىستى قۇرىلىس يەلەرىنە ارنايى ۇسىنىستار ازىرلەندى.
"بارلىق سۋ قويماسى بەلگىلەنگەن جوسپارعا سايكەس جۇمىس ىستەيدى، ال كوكتەمگى سۋ تاسقىنىنا بايلانىستى بۇل كەستە تۇزەتىلىپ وتىرادى. قار سۋىنىڭ كولەمىن باسقارۋ ماقساتىندا سولتۇستىك، شىعىس، ورتالىق جانە باتىس وڭىرلەردەگى سۋ قويمالارىنان ارتىق سۋ اعىزىلدى. ال وڭتۇستىك ايماقتاردا سۋ قويمالارىنىڭ جۇمىسى سۋ جيناۋ رەجيمىندە جالعاسۋدا"، – دەپ مالىمدەدى ول.
ايتا كەتسەك، قازاقستاندا 8 باسسەيندىك ينسپەكسيا بار. ولار: ارال-سىرداريا، بالقاش-الاكول، ەرتىس، ەسىل، جايىق-كاسپيي، نۇرا-سارىسۋ، توبىل-تورعاي جانە شۋ-تالاس باسسەيندەرى.
