Dál qazirgi jaǵdaida Maqtaaral aýdanynyń 4 eldimekeni iaǵni, Jańaturmys (46 úi), Jeńis (130 úi), Firdoýsi (250 úi) jáne Órgebas (194 úi) sý astynda qaldy. Jalpy qyzyl sýdan aýdandaǵy 620 úidiń irgesi sógilip, qulaýǵa ainalǵan. Turǵyndardy kóshirý úshin 22 evakýatsiialyq oryn daiarlanyp, onda ornalasqandar sany 3500-ge jetti. Evakýatsiialyq bólimderde 120 meditsina qyzmetkeri turǵyndardy jiti tekserip, qajetti kómek kórsetýde.
Budan bólek, Maqtaaral aýdanyndaǵy sý tasqynyna orai aýyl sharýashylyǵy salasynda qyzyl sý astynda qalǵan egistik daqyl túrleri men mal basy sanyn túgendeý jumystary jalǵasýda. Bul jaýapty ispen arnaiy basqarma basshylary bastaǵan jumysshy toby ainalysyp jatyr.
Qazirdiń ózinde mamandar 3600 gektardan astam aýyl sharýashylyǵy daqyldarynyń sý astynda qalyp, zardap shekkenin anyqtap otyr. Aldyn ala boljam boiynsha shyǵyn kólemi 404 mln teńgeni quraǵan. Árine, bul ázirge belgilisi ǵana. Ásirese, Jańajol, Eńbekshi aýyl okrýgterine qarasty Jeńis, Jańaturmys, Jantaqsai aýyldaryndaǵy alqaptar kóptep zardap shekkenin baiqaý qiyn emes. Sý astynda qalǵan egistik alqaptyń 85 paiyzy maqta, qalǵany jońyshqa men júgerige tiesili.
Bul rette halyqqa aitarymyz, turǵyndardyń úileri, ólgen maldary men shyǵyndary eseptelip, tizim jasaqtalady. Soǵan sai kómek kórsetiledi. Sondyqtan shyǵynymyz ótelmei qala ma dep alańdaýǵa negiz joq.
Mine, qarasańyz, tótenshe jaǵdai aimaǵynda az jumys atqarylyp jatqan joq. Oblys ákimi Ómirzaq Estaiulynyń ózi bas bolyp, orynbasarlary, basqarma basshylary, bólim mamandary, politsiia men tótenshe jaǵdai, meditsina qyzmetkerleri, BAQ ókilderinen quralǵan 600-ge jýyq adam Maqtaaral aýdanynda kúndiz-túni tynbai jumys isteýde. Kim úshin? Árine, halyq úshin. Óitkeni qasietti Myrzashól óńiri – Túrkistan oblysynyń aýyl sharýashylyǵy salasyndaǵy negizgi qozǵaýshy kúshi.
Desek te, sońǵy eki-úsh kúnde áleýmettik jelilerde "Ózbekstan sýdy ádeii jiberipti. Sý qoimasyn bireýler qasaqana buzypty. Jergilikti bilik tótenshe jaǵdaidyń týyndaitynyn bile tura, áreketsiz otyrdy. Sý tasqyny bolatynyn eskertpedi. Nege aldyn ala aitpaidy?" degen syńaily pikirler jazylýda. Bir nárse anyq. Jedel shtab qurylyp, tynbai jumys júrgizip jatyr. Sondyqtan eger naqty kóz jetpese, túrli qaýeset aqpar taratyp, el ishine negizsiz dúrbeleń salýdy qoiý kerek. Halyq onsyz da koronavirýs indetine bailanysty tótenshe jaǵdaidan úrei qushyp otyrǵanda odan beter úrkite berý, qorqyta berý azamattyqqa jatpaidy dep esepteimin. Myńdaǵan adamǵa qyzmet kórsetý barysynda kemshilikter kezdesýi múmkin. Túrli problemalar da týyndaýda. Degenmen memleket barynsha eldi qorǵaýǵa, qaýipsizdigin saqtaýǵa kúsh salyp jatqanyn moiyndaǵan jón.
Qashanda jurtty syrttai synaý, mineý ońai. Topan sý tutas eldi ábigerge salyp turǵan sátte alystan dálelsiz aqparat taratýdan góri eriktiler qataryna qosylýdy usynamyz. Maqtaaralǵa kelip, qyzmet etip, patriot ekenimizdi kórseteiik. Oraza aiynda Maqtaaral, Jetisai aýdanynyń halqyna jaqsylyq tileseńiz, sizdiń elge jasaǵan saýapty isińiz sanalary sózsiz.
Jasyratyny joq, óz úiin óleń tósegin, pálen jyl ter tógip, turǵyzǵan baspanasyn, taban aqy, mańdai terimen jinaǵan mal-múlkin eshkim dalaǵa bostan-bosqa tastap ketkisi kelmeidi. Amalsyzdan shiettei bala-shaǵasy men ózderiniń bas amandyǵyn ǵana oilaýǵa májbúr bolary haq. Sondyqtan biz qiyndyqqa ushyraǵan qarapaiym halyqtyń, jany jomart myrzashóldikterdiń jaǵdaiyn jasap, barynsha qoldaý kórsetýimiz kerek.
Qurmetti aǵaiyndar! Men sizderdi qiyndyqqa tap bolǵan maqtaaraldyqtarǵa qoldaý bildirýge shaqyramyn. Atymtai Jomart, qoly ashyq, qaiyrymdy azamattar úshin "Túrkistan" korporativtik áleýmettik damý qory jumysyn bastaǵanyn habarlaýdy jón kórip otyrmyn.
Beisen TÁJIBAEV, "Nur Otan" partiiasy Túrkistan oblystyq filialy tóraǵasynyń birinshi orynbasary.
