ءدال قازىرگى جاعدايدا ماقتاارال اۋدانىنىڭ 4 ەلدىمەكەنى ياعني، جاڭاتۇرمىس (46 ءۇي)، جەڭىس (130 ءۇي)، فيردوۋسي (250 ءۇي) جانە ورگەباس (194 ءۇي) سۋ استىندا قالدى. جالپى قىزىل سۋدان اۋدانداعى 620 ءۇيدىڭ ىرگەسى سوگىلىپ، قۇلاۋعا اينالعان. تۇرعىنداردى كوشىرۋ ءۇشىن 22 ەۆاكۋاسيالىق ورىن دايارلانىپ، وندا ورنالاسقاندار سانى 3500-گە جەتتى. ەۆاكۋاسيالىق بولىمدەردە 120 مەديسينا قىزمەتكەرى تۇرعىنداردى ءجىتى تەكسەرىپ، قاجەتتى كومەك كورسەتۋدە.
ال پوليسيا قىزمەتكەرلەرى جەڭىس، جاڭاتۇرمىس، فيردوۋسي، ورگەباس ەلدىمەكەندەرىنە 5 بلوك-بەكەت ورناتىپ، قاۋىپسىزدىكتى قامتاماسىز ەتۋدە. سونىمەن قاتار، كورشىلەس جەتىساي اۋدانى، قوعالى ەلدىمەكەنىندە قاۋىپسىزدىكتى كۇشەيتۋ ماقساتىندا 5 تەحنيكا، 508 ادام جۇمىلدىرىلعان.
بۇدان بولەك، ماقتاارال اۋدانىنداعى سۋ تاسقىنىنا وراي اۋىل شارۋاشىلىعى سالاسىندا قىزىل سۋ استىندا قالعان ەگىستىك داقىل تۇرلەرى مەن مال باسى سانىن تۇگەندەۋ جۇمىستارى جالعاسۋدا. بۇل جاۋاپتى ىسپەن ارنايى باسقارما باسشىلارى باستاعان جۇمىسشى توبى اينالىسىپ جاتىر.
ءقازىردىڭ وزىندە ماماندار 3600 گەكتاردان استام اۋىل شارۋاشىلىعى داقىلدارىنىڭ سۋ استىندا قالىپ، زارداپ شەككەنىن انىقتاپ وتىر. الدىن الا بولجام بويىنشا شىعىن كولەمى 404 ملن تەڭگەنى قۇراعان. ارينە، بۇل ازىرگە بەلگىلىسى عانا. اسىرەسە، جاڭاجول، ەڭبەكشى اۋىل وكرۋگتەرىنە قاراستى جەڭىس، جاڭاتۇرمىس، جانتاقساي اۋىلدارىنداعى القاپتار كوپتەپ زارداپ شەككەنىن بايقاۋ قيىن ەمەس. سۋ استىندا قالعان ەگىستىك القاپتىڭ 85 پايىزى ماقتا، قالعانى جوڭىشقا مەن جۇگەرىگە تيەسىلى.
ماقتاارال اۋدانىندا الداعى ۋاقىتتا سۋ باسۋ ءقاۋپى بار اۋىلداردا مالدى ەۆاكۋاسيالاۋ جۇمىستارى دا توقتاۋسىز جۇرگىزىلۋدە. ءقازىردىڭ وزىندە سۋ تاسقىنى ورىن العان جانە ءقاۋىپتى دەپ تانىلعان 7 ەلدىمەكەننەن ياعني، جەڭىس، جاڭاتۇرمىس، جانتاقساي، فەردوۋسي، ەڭبەكشى، نۇرلىتاڭ، ورگەباس اۋىلدارىنان 3115 ءىرى قارا، 1101 جىلقى، 585 قوي، 34 تۇيە قىزىل سۋ شايماعان القاپتارعا شىعارىلدى. ال سۋعا كەتىپ ولگەن مال سانىن ازىرگە انىقتاۋ ءتىپتى مۇمكىن ەمەس. بۇل جۇمىستارعا تاسقىن سۋدىڭ ءالى دە بولسا توقتاماي تۇرعانى قولبايلاۋ ەكەنىن ايتپاسا دا تۇسىنىكتى.
بۇل رەتتە حالىققا ايتارىمىز، تۇرعىنداردىڭ ۇيلەرى، ولگەن مالدارى مەن شىعىندارى ەسەپتەلىپ، ءتىزىم جاساقتالادى. سوعان ساي كومەك كورسەتىلەدى. سوندىقتان شىعىنىمىز وتەلمەي قالا ما دەپ الاڭداۋعا نەگىز جوق.
مىنە، قاراساڭىز، توتەنشە جاعداي ايماعىندا از جۇمىس اتقارىلىپ جاتقان جوق. وبلىس اكىمى ءومىرزاق ەستاي ۇلىنىڭ ءوزى باس بولىپ، ورىنباسارلارى، باسقارما باسشىلارى، ءبولىم ماماندارى، پوليسيا مەن توتەنشە جاعداي، مەديسينا قىزمەتكەرلەرى، ب ا ق وكىلدەرىنەن قۇرالعان 600-گە جۋىق ادام ماقتاارال اۋدانىندا كۇندىز-تۇنى تىنباي جۇمىس ىستەۋدە. كىم ءۇشىن؟ ارينە، حالىق ءۇشىن. ويتكەنى قاسيەتتى ءمىرزاشول ءوڭىرى – تۇركىستان وبلىسىنىڭ اۋىل شارۋاشىلىعى سالاسىنداعى نەگىزگى قوزعاۋشى كۇشى.
حالقى ەڭبەكقور، ازاننان قارا كەشكە دەيىن ەگىن ەگىپ، ادال ماڭداي تەرىمەن ءناپاقا تاۋىپ وتىرعان شارۋالار شوعىرلانعان اۋدان. مىنە، ەڭ ءبىرىنشى كەزەكتە وسى ازاماتتاردىڭ قاۋىپسىزدىگى مەن ءومىرى قورعالۋى ءتيىس. وسى تۇرعىدان قاراعاندا ءبىز مىرزاشولدىكتەردىڭ قاسىنان تابىلىپ، قيىن ساتتە دەمەۋ بەرۋگە، قول ۇشىن سوزۋعا مىندەتتىمىز.
دەسەك تە، سوڭعى ەكى-ۇش كۇندە الەۋمەتتىك جەلىلەردە "وزبەكستان سۋدى ادەيى جىبەرىپتى. سۋ قويماسىن بىرەۋلەر قاساقانا بۇزىپتى. جەرگىلىكتى بيلىك توتەنشە جاعدايدىڭ تۋىندايتىنىن بىلە تۇرا، ارەكەتسىز وتىردى. سۋ تاسقىنى بولاتىنىن ەسكەرتپەدى. نەگە الدىن الا ايتپايدى؟" دەگەن سىڭايلى پىكىرلەر جازىلۋدا. ءبىر نارسە انىق. جەدەل شتاب قۇرىلىپ، تىنباي جۇمىس جۇرگىزىپ جاتىر. سوندىقتان ەگەر ناقتى كوز جەتپەسە، ءتۇرلى قاۋەسەت اقپار تاراتىپ، ەل ىشىنە نەگىزسىز دۇربەلەڭ سالۋدى قويۋ كەرەك. حالىق ونسىز دا كوروناۆيرۋس ىندەتىنە بايلانىستى توتەنشە جاعدايدان ۇرەي قۇشىپ وتىرعاندا ودان بەتەر ۇركىتە بەرۋ، قورقىتا بەرۋ ازاماتتىققا جاتپايدى دەپ ەسەپتەيمىن. مىڭداعان ادامعا قىزمەت كورسەتۋ بارىسىندا كەمشىلىكتەر كەزدەسۋى مۇمكىن. ءتۇرلى پروبلەمالار دا تۋىنداۋدا. دەگەنمەن مەملەكەت بارىنشا ەلدى قورعاۋعا، قاۋىپسىزدىگىن ساقتاۋعا كۇش سالىپ جاتقانىن مويىنداعان ءجون.
قاشاندا جۇرتتى سىرتتاي سىناۋ، مىنەۋ وڭاي. توپان سۋ تۇتاس ەلدى ابىگەرگە سالىپ تۇرعان ساتتە الىستان دالەلسىز اقپارات تاراتۋدان گورى ەرىكتىلەر قاتارىنا قوسىلۋدى ۇسىنامىز. ماقتاارالعا كەلىپ، قىزمەت ەتىپ، پاتريوت ەكەنىمىزدى كورسەتەيىك. ورازا ايىندا ماقتاارال، جەتىساي اۋدانىنىڭ حالقىنا جاقسىلىق تىلەسەڭىز، ءسىزدىڭ ەلگە جاساعان ساۋاپتى ءىسىڭىز سانالارى ءسوزسىز.
جاسىراتىنى جوق، ءوز ءۇيىن ولەڭ توسەگىن، پالەن جىل تەر توگىپ، تۇرعىزعان باسپاناسىن، تابان اقى، ماڭداي تەرىمەن جيناعان مال-مۇلكىن ەشكىم دالاعا بوستان-بوسقا تاستاپ كەتكىسى كەلمەيدى. امالسىزدان شيەتتەي بالا-شاعاسى مەن وزدەرىنىڭ باس اماندىعىن عانا ويلاۋعا ءماجبۇر بولارى حاق. سوندىقتان ءبىز قيىندىققا ۇشىراعان قاراپايىم حالىقتىڭ، جانى جومارت مىرزاشولدىكتەردىڭ جاعدايىن جاساپ، بارىنشا قولداۋ كورسەتۋىمىز كەرەك.
قۇرمەتتى اعايىندار! مەن سىزدەردى قيىندىققا تاپ بولعان ماقتاارالدىقتارعا قولداۋ بىلدىرۋگە شاقىرامىن. اتىمتاي جومارت، قولى اشىق، قايىرىمدى ازاماتتار ءۇشىن "تۇركىستان" كورپوراتيۆتىك الەۋمەتتىك دامۋ قورى جۇمىسىن باستاعانىن حابارلاۋدى ءجون كورىپ وتىرمىن.
قازاق دالاسىنىڭ تۇكپىر-تۇكپىرىنەن ەل مىرزاشولدىكتەرگە تىلەۋلەستىك ءبىلدىرىپ جاتىر. بۇگىن توپان سۋدان زارداپ شەككەن حالىققا كومەك بەرۋ ءۇشىن العاش بولىپ، جامبىل وبلىسىنان 30 توننا ازىق-تۇلىك، كيىم-كەشەك تيەلگەن ءۇش جۇك كولىگى كەلە جاتقانىن قۋانا جەتكىزگىم كەلەدى. وسىنداي قيىن-قىستاۋ كەزەڭدى باستان وتكەرىپ جاتقان ءمىرزاشول حالقىنا شىنايى قولداۋ بىلدىرگەن كورشى وبلىستىڭ باسشىلىعى مەن حالقىنا شىنايى العىس ايتامىن. بارشاڭىزدىڭ جاساعان جاقسىلىقتارىڭىز اللادان مىڭ ەسەلەپ قايتسىن! گۋمانيتارلىق كومەكتى جەرگىلىكتى اقساقالدار، پارتيا جانە قوعام بەلسەندىلەرىنەن قۇرىلعان توپ قاداعالاۋعا الادى. ءاربىر تۇرعىنعا كومەكتى جەتكىزىپ، قيىندىقتا بىر-بىرىمىزگە دەمەۋ بولايىق.
بەيسەن تاجىبايەۆ، "Nur Otan" پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى.
