Saiasatker Muhtar Taijan biylǵy qýańshylyqqa bailanysty Úkimet jedel túrde tótenshe jaǵdai jariialaýy kerektigin aitty dep habarlaidy Dalanews.kz.
Almaty oblysyna qarasty Kegen aýylyna arnaiy barǵan saiasatker óziniń aitýynsha “óte qorqynyshty” jaǵdaiǵa kýá bolǵan.
“Aýyldaǵy ahýal aýyr, apattyń aldynda tur. Jaiylym joq jer joqtyń qasy, buǵan biylǵy jylǵy qýańshylyq qabattasyp, aýyldaǵy aǵaiynnyń apai-topaiyn shyǵarǵan jaiy bar”, – deidi ol.
Kegendegi jaǵdaidy kózben kórgen Muhtar Taijan Mańǵystaý men Qyzylorda oblysyndaǵy iri qara men usaq maldyń ashtyqtan qyrylýy jappai el kóleminde oryn alýy múmkin deidi. Sonyń saldarynan aýyldaǵy jurttyń áleýmettik jaǵdaiy kúrt tómendep, al azyq-túliktiń baǵasy aspandap ketedi.
“Erteńgi kúni ettiń baǵasy sharyqtap shyǵa kelse, munyń áserin kúlli Qazaqstan halqy sezinedi. Dál biz asa kúrdeli, óte qaýipti jaǵdaidyń aldynda turmyz.
Úkimet halyqtyń sózine qulaq asyp, elde tótenshe jaǵdai jariialaýy kerek! Ashtyqtan aman qalǵan tórt túlikti jem-shóppen qamtamasyz etý maqsatynda memleket deńgeiinde arnaiy Shtab qurylýy qajet!
Qýańshylyq aýyldaǵy halyqty alqymnan alyp, jem-shóptiń tapshylyǵy sharýalardy qysyp barady. Malmen kún kórip otyrǵan eldiń tózimi taýsylýǵa taqaý. Bul naǵyz tótenshe jaǵdai. Qalalyq jerdegi qaýym muny áli sezine qoiǵan joq. Alaida qazirden bastap qam jasamaq, munyń zardaptaryn erteńgi kúni muny qala turǵyndary da aiqyn sezinetin bolady”, – deidi Taijan.
Saiasatkerdiń pikirinshe, osy kúnge deiin bankirlerge, qurylys kompaniialaryna qol ushyn sozyp, suraýsyz milliardtardy ústi-ústine aýdaryp kelgen Úkimet dál osy shaqta aýyl turǵyndaryn qutqarýy qajet.
Aita ketelik, budan buryn Mańǵystaý oblysynyń turǵyndary oblys kóleminde tótenshe jaǵdai jariialaý kerek dep dabyl qaqqan edi. Aimaqta qýańshylyqtan shóp shyqpai qalǵan. Qudyqtaǵy jerasty sýy da tartyla bastaǵan.
Jyl basynan beri óńirde 1400-ge jýyq jylqy, qoi, túie qyryldy. Jem-shóp baǵasy da sharyqtap ketken.
Qazir bir qap kebektiń baǵasy – 2000 teńge, bir baý shóptiń quny 16 000 teńgege ósken. Sondyqtan sharýalar mal azyǵyn alýǵa memleket tarapynan kómek kerek deidi. Al ákimdik máseleni sheshýge qarjy bólindi dep otyr.
