Búgin Temirlanda Ordabasy aýdanynyń 60 jyldyǵy toilandy. Saltanatty jiynǵa oblys ákiminiń orynbasary Beisenbai Tájibaev, oblystyq máslihatynyń tóraǵasy Nuraly Ábishev, aýdan ákimi Azat Oralbaev, sonymen qatar ziialy qaýym ókilderi men depýttar, aýdan turǵyndary men qonaqtary qatysty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Aldymen quttyqtaý sóz sóilegen oblys ákiminiń orynbasary Beisenbai Tájibaev aýdan turǵyndaryna ystyq lebizin jetkizdi.
– Tatýlyqty tý etken, qazaq halqynyń birlik simvolyna ainalǵan aýdan halqyn osy mereili sátpen quttyqtaimyn! Degenmen, Ordabasynyń tarihy 60 jyl emes, kóne zamandarǵa, júzjyldyqtarǵa jeteleitinin bárimiz bilemiz.
Bul óńir jurtshylyǵy jomarttyǵymen, salt-dástúrge beriktigimen erekshelenedi. Tarihtan belgili, qazaq-jońǵar shaiqasy kezinde kósh bastaǵan erler men biler Ordabasy taýynda bas qosyp, el birligin bekemdegen. Jaýǵa qarsy kúsh biriktirip, jeńiske jol ashqan.
Qazirgi tańda, Ordabasy aýdany barlyq baǵytta damýdyń jańa belesine kóterilgen, oblys ekonomikasyna ózindik úlesi mol óńir retinde órkendep keledi. Endeshe, ordabasylyqtardy merekemen quttyqtaimyn! Tektiler týǵan ólkemiz órkendep, mártebesi biiktei bersin! – dedi oblys ákiminiń orynbasary.
Dúbirli toi barysynda aitýly belesti jetistikpen baǵyndyrýǵa eńbek sińirgen azamattarǵa merekelik medal tabystaldy.
«Altyn kúzden» bastaý alǵan is-shara aýylsharýashylyq ónimderi men tehnikalary, qolóner buiymdarynyń kórmesi kópshilik nazaryna usynyldy. Ulttyq-mádeni ortalyqtar kelýshilerge qushaq ashty. Qoǵam qairatkeri Ábish Kekilbaev qazaq rýhynyń qaǵbasyna teńegen qasietti óńirdi mereili merekesimen quttyqtaýǵa aýdannan qanattanyp ushqan ardaqty azamattar da aǵyldy.
Tarih tereńinen syr shertken sahnalyq qoiylym Ordabasy jeriniń bar qasieti men kiesin pash etti. Kúmis kómei ánshiler, kúishiler men bishiler de bul toida aianyp qalmady. Estrada juldyzdarynyń kontserttik baǵdarlamasy merekeniń shyraiyn ashyp, Ordabasy jurtshylyǵyna keremet kóńil-kúi syilady. Ordabasylyqtardyń dúrkiretken bul toiy merekelik ot shashýmen aiaqtaldy.
Aita keteiik, Ordabasy aýdany ákimshilik aýmaq retinde Bógen ataýymen 1964 jylǵy 3 naýryzda qurylǵan. 1988 jyly Bógen aýdany Arys aýdanynyń qaramaǵyna kirgen. Sodan soń 1989 jyly Arys qalasynan enshi alyp shyǵyp, derbes aýdan atandy. Al 1993 jyly aýdanǵa Ordabasy ataýy qaitaryldy. Sol jyly qasietti taýda Táýelsizdikti, el birligin ulyqtaǵan uly jiyn ótti. 1997 jyly Ordabasy taýynyń biik tusyna 30 metrlik záýlim monýment ornatyldy. Ol eskertkishte uly handarymyz ben bilerimizdiń, batyrlarymyz ben tutas qazaq halqynyń armany men maqsaty beinelengen.
