بۇگىن تەمىرلاندا ورداباسى اۋدانىنىڭ 60 جىلدىعى تويلاندى. سالتاناتتى جيىنعا وبلىس اكىمىنىڭ ورىنباسارى بەيسەنباي تاجىبايەۆ، وبلىستىق ءماسليحاتىنىڭ ءتوراعاسى نۇرالى ابىشيەۆ، اۋدان اكىمى ازات ورالبايەۆ، سونىمەن قاتار زيالى قاۋىم وكىلدەرى مەن دەپۋتتار، اۋدان تۇرعىندارى مەن قوناقتارى قاتىستى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
الدىمەن قۇتتىقتاۋ ءسوز سويلەگەن وبلىس اكىمىنىڭ ورىنباسارى بەيسەنباي تاجىبايەۆ اۋدان تۇرعىندارىنا ىستىق لەبىزىن جەتكىزدى.
– تاتۋلىقتى تۋ ەتكەن، قازاق حالقىنىڭ بىرلىك سيمۆولىنا اينالعان اۋدان حالقىن وسى مەرەيلى ساتپەن قۇتتىقتايمىن! دەگەنمەن، ورداباسىنىڭ تاريحى 60 جىل ەمەس، كونە زاماندارعا، ءجۇزجىلدىقتارعا جەتەلەيتىنىن ءبارىمىز بىلەمىز.
بۇل ءوڭىر جۇرتشىلىعى جومارتتىعىمەن، سالت-داستۇرگە بەرىكتىگىمەن ەرەكشەلەنەدى. تاريحتان بەلگىلى، قازاق-جوڭعار شايقاسى كەزىندە كوش باستاعان ەرلەر مەن بيلەر ورداباسى تاۋىندا باس قوسىپ، ەل بىرلىگىن بەكەمدەگەن. جاۋعا قارسى كۇش بىرىكتىرىپ، جەڭىسكە جول اشقان.
قازىرگى تاڭدا، ورداباسى اۋدانى بارلىق باعىتتا دامۋدىڭ جاڭا بەلەسىنە كوتەرىلگەن، وبلىس ەكونوميكاسىنا وزىندىك ۇلەسى مول ءوڭىر رەتىندە وركەندەپ كەلەدى. ەندەشە، ورداباسىلىقتاردى مەرەكەمەن قۇتتىقتايمىن! تەكتىلەر تۋعان ولكەمىز وركەندەپ، مارتەبەسى بيىكتەي بەرسىن! – دەدى وبلىس اكىمىنىڭ ورىنباسارى.
ءدۇبىرلى توي بارىسىندا ايتۋلى بەلەستى جەتىستىكپەن باعىندىرۋعا ەڭبەك سىڭىرگەن ازاماتتارعا مەرەكەلىك مەدال تابىستالدى.
«التىن كۇزدەن» باستاۋ العان ءىس-شارا اۋىلشارۋاشىلىق ونىمدەرى مەن تەحنيكالارى، قولونەر بۇيىمدارىنىڭ كورمەسى كوپشىلىك نازارىنا ۇسىنىلدى. ۇلتتىق-مادەني ورتالىقتار كەلۋشىلەرگە قۇشاق اشتى. قوعام قايراتكەرى ءابىش كەكىلبايەۆ قازاق رۋحىنىڭ قاعباسىنا تەڭەگەن قاسيەتتى ءوڭىردى مەرەيلى مەرەكەسىمەن قۇتتىقتاۋعا اۋداننان قاناتتانىپ ۇشقان ارداقتى ازاماتتار دا اعىلدى.
تاريح تەرەڭىنەن سىر شەرتكەن ساحنالىق قويىلىم ورداباسى جەرىنىڭ بار قاسيەتى مەن كيەسىن پاش ەتتى. كۇمىس كومەي انشىلەر، كۇيشىلەر مەن بيشىلەر دە بۇل تويدا ايانىپ قالمادى. ەسترادا جۇلدىزدارىنىڭ كونسەرتتىك باعدارلاماسى مەرەكەنىڭ شىرايىن اشىپ، ورداباسى جۇرتشىلىعىنا كەرەمەت كوڭىل-كۇي سىيلادى. ورداباسىلىقتاردىڭ دۇركىرەتكەن بۇل تويى مەرەكەلىك وت شاشۋمەن اياقتالدى.
ايتا كەتەيىك، ورداباسى اۋدانى اكىمشىلىك اۋماق رەتىندە بوگەن اتاۋىمەن 1964 جىلعى 3 ناۋرىزدا قۇرىلعان. 1988 جىلى بوگەن اۋدانى ارىس اۋدانىنىڭ قاراماعىنا كىرگەن. سودان سوڭ 1989 جىلى ارىس قالاسىنان ەنشى الىپ شىعىپ، دەربەس اۋدان اتاندى. ال 1993 جىلى اۋدانعا ورداباسى اتاۋى قايتارىلدى. سول جىلى قاسيەتتى تاۋدا تاۋەلسىزدىكتى، ەل بىرلىگىن ۇلىقتاعان ۇلى جيىن ءوتتى. 1997 جىلى ورداباسى تاۋىنىڭ بيىك تۇسىنا 30 مەترلىك ءزاۋلىم مونۋمەنت ورناتىلدى. ول ەسكەرتكىشتە ۇلى حاندارىمىز بەن بيلەرىمىزدىڭ، باتىرلارىمىز بەن تۇتاس قازاق حالقىنىڭ ارمانى مەن ماقساتى بەينەلەنگەن.
