Belgili jýrnalıs Mıhaıl Kozachkov burynǵy joǵary laýazymdy sheneýnik ınternet-alaıaqtardyń arbaýyna túsip, 50 mıllıon teńgeden astam qarjysynan aıyrylǵanyn jazdy, dep habarlaıdy Dalanews.kz.
Onyń aıtýynsha, jábirlenýshi — Konstıtýsıalyq Keńestiń eks-múshesi, zań ǵylymdarynyń profesory Serik Temirbolatov.
“Taǵy bir joǵary laýazymdy tulǵa ınternet-alaıaqtardyń qurbanyna aınaldy. Temirbolatov messendjer arqyly kelgen habarlamalarǵa senip, 20 mıllıon teńgeni túrli shotqa aýdarǵan. Budan bólek, taǵy 33 mıllıon teńgege jýyq qarajatty kýrerdiń qolyna ustatyp jibergen”, — dep jazady Kozachkov.
Oqıǵa Astanadaǵy qylmystyq ister jónindegi mamandandyrylǵan aýdanaralyq sotta qaraldy. İs boıynsha aıyptalýshy — MGIMO-nyń 22 jastaǵy stýdenti Rýstam Hýdyshın. Ol Pavlodar oblysynyń týmasy. Jýrnalıstiń málimetinshe, ol oqýyn aıaqtamaı, Astanaǵa oralyp, qarajat tabý maqsatynda ınternetten “Maga” esimdi adammen tanysyp, kýrerlik jumysqa kelisim bergen.
“Eń qyzyǵy, aqsha Hýdyshınniń qolyna qalaı tústi? Belgisiz bireýler WhatsApp arqyly tanymal adamdardyń atyn jamylyp, senimge kirip otyrǵan. Máselen, Temirbolatovqa óz basshysy Qaırat Mámı bolyp habarlasqan alaıaq, ony arnaıy qyzmetter terrorısterdi qarjylandyrý isi boıynsha tergep jatqanyn aıtyp, UQK qyzmetkerlerimen yntymaqtastyq ornatýǵa úgittegen”, — deıdi Kozachkov.
Onyń aıtýynsha, 70 jastaǵy profesor kúmándanbastan aıtylǵandardy oryndaǵan: aldymen jalǵan “UQK ókilimen”, keıin jalǵan “Ulttyq bank qyzmetkerimen” sóılesip, olardyń nusqaýymen birneshe esepshotqa aqsha aýdaryp, iri kólemde qarajatty qolma-qol alǵan. Osy kezde is júzinde áreket etken — aıyptalýshy Hýdyshın. Ol aqshany alyp, “Mega Exchange” aıyrbastaý pýnktine aparǵan.
Biraz ýaqyt ótken soń eks-sheneýnik ózin aldap ketkenin túsinip, quqyq qorǵaý organdaryna aryzdanǵan. Tergeý barysynda taǵy eki adamnyń osy shema arqyly aldanǵany belgili boldy.
Sot Rýstam Hýdyshındi kináli dep tanyp, ony 5 jylǵa bas bostandyǵynan aıyrdy. Sonymen qatar aıyptalýshydan 120 mıllıon teńgeden astam qarajat óndiriletin boldy.
“Sirá, dıplomatıalyq mansap Hýdyshın úshin keıinge qalatyn sıaqty”, — dep túıindedi Mıhaıl Kozachkov.
Úkim ázirge zańdy kúshine engen joq.
