بەلگىلى جۋرناليست ميحايل كوزاچكوۆ بۇرىنعى جوعارى لاۋازىمدى شەنەۋنىك ينتەرنەت-الاياقتاردىڭ ارباۋىنا ءتۇسىپ، 50 ميلليون تەڭگەدەن استام قارجىسىنان ايىرىلعانىن جازدى، دەپ حابارلايدى Dalanews.kz.
ونىڭ ايتۋىنشا، جابىرلەنۋشى — كونستيتۋسيالىق كەڭەستىڭ ەكس-مۇشەسى، زاڭ عىلىمدارىنىڭ پروفەسسورى سەرىك تەمىربولاتوۆ.
“تاعى ءبىر جوعارى لاۋازىمدى تۇلعا ينتەرنەت-الاياقتاردىڭ قۇربانىنا اينالدى. تەمىربولاتوۆ مەسسەندجەر ارقىلى كەلگەن حابارلامالارعا سەنىپ، 20 ميلليون تەڭگەنى ءتۇرلى شوتقا اۋدارعان. بۇدان بولەك، تاعى 33 ميلليون تەڭگەگە جۋىق قاراجاتتى كۋرەردىڭ قولىنا ۇستاتىپ جىبەرگەن”، — دەپ جازادى كوزاچكوۆ.
وقيعا استاناداعى قىلمىستىق ىستەر جونىندەگى مامانداندىرىلعان اۋدانارالىق سوتتا قارالدى. ءىس بويىنشا ايىپتالۋشى — مگيمو-نىڭ 22 جاستاعى ستۋدەنتى رۋستام حۋدىشين. ول پاۆلودار وبلىسىنىڭ تۋماسى. ءجۋرناليستتىڭ مالىمەتىنشە، ول وقۋىن اياقتاماي، استاناعا ورالىپ، قاراجات تابۋ ماقساتىندا ينتەرنەتتەن “ماگا” ەسىمدى اداممەن تانىسىپ، كۋرەرلىك جۇمىسقا كەلىسىم بەرگەن.
“ەڭ قىزىعى، اقشا ءحۋدىشيننىڭ قولىنا قالاي ءتۇستى؟ بەلگىسىز بىرەۋلەر WhatsApp ارقىلى تانىمال ادامداردىڭ اتىن جامىلىپ، سەنىمگە كىرىپ وتىرعان. ماسەلەن، تەمىربولاتوۆقا ءوز باسشىسى قايرات ءمامي بولىپ حابارلاسقان الاياق، ونى ارنايى قىزمەتتەر تەرروريستەردى قارجىلاندىرۋ ءىسى بويىنشا تەرگەپ جاتقانىن ايتىپ، ۇقك قىزمەتكەرلەرىمەن ىنتىماقتاستىق ورناتۋعا ۇگىتتەگەن”، — دەيدى كوزاچكوۆ.
ونىڭ ايتۋىنشا، 70 جاستاعى پروفەسسور كۇماندانباستان ايتىلعانداردى ورىنداعان: الدىمەن جالعان “ۇقك وكىلىمەن”، كەيىن جالعان “ۇلتتىق بانك قىزمەتكەرىمەن” سويلەسىپ، ولاردىڭ نۇسقاۋىمەن بىرنەشە ەسەپشوتقا اقشا اۋدارىپ، ءىرى كولەمدە قاراجاتتى قولما-قول العان. وسى كەزدە ءىس جۇزىندە ارەكەت ەتكەن — ايىپتالۋشى حۋدىشين. ول اقشانى الىپ، “Mega Exchange” ايىرباستاۋ پۋنكتىنە اپارعان.
ءبىراز ۋاقىت وتكەن سوڭ ەكس-شەنەۋنىك ءوزىن الداپ كەتكەنىن ءتۇسىنىپ، قۇقىق قورعاۋ ورگاندارىنا ارىزدانعان. تەرگەۋ بارىسىندا تاعى ەكى ادامنىڭ وسى سحەما ارقىلى الدانعانى بەلگىلى بولدى.
سوت رۋستام ءحۋدىشيندى كىنالى دەپ تانىپ، ونى 5 جىلعا باس بوستاندىعىنان ايىردى. سونىمەن قاتار ايىپتالۋشىدان 120 ميلليون تەڭگەدەن استام قاراجات وندىرىلەتىن بولدى.
“ءسىرا، ديپلوماتيالىق مانساپ حۋدىشين ءۇشىن كەيىنگە قالاتىن سياقتى”، — دەپ تۇيىندەدى ميحايل كوزاچكوۆ.
ۇكىم ازىرگە زاڭدى كۇشىنە ەنگەن جوق.
