Almaty qalasynyń prokýratýrasy Abai atyndaǵy Qazaq ulttyq pedagogikalyq ýniversiteti (QazUPÝ) ǵimarattarynyń bir bóligin memleket menshigine qaitardy. Tekserý barysynda ýniversitet nysandary uzaq jyldar boiy burynǵy rektorǵa affilirlengen tulǵalarǵa zańsyz berilip, keiin sol ǵimarattar qaitadan oqý ornynyń ózine jalǵa tapsyrylǵany anyqtalǵan, dep habarlaidy Dalanews.kz Tengrinews.kz saityna silteme jasap.
31 qańtarda prokýratýra QazUPÝ-dyń 208 sharshy metrden asatyn ǵimaraty zańsyz jekeshelendirilgenin habarlaǵan bolatyn. Sot mámilelerdi jaramsyz dep tanyp, qaitarylǵan aktivti memlekettik múlik jónindegi ýákiletti organ baǵalaýǵa kirisken.
Bul is boiynsha egjei-tegjeili málimetti Medeý aýdandyq prokýratýrasy usyndy.
Sport korpýsyn affilirlengen kompaniiaǵa satqan
Prokýratýra málimetinshe, tekserý barysynda «memleket pen ýniversitet múddesine qaishy túrde úshinshi tulǵalarǵa zańsyz satylǵan» birneshe nysan anyqtalǵan.
Solardyń biri – Qazybek bi kóshesi, 30 mekenjaiynda ornalasqan №4 oqý-sport korpýsy. Ǵimarattyń jalpy aýmaǵy shamamen 1 400 sharshy metr.
Vedomstvo dereginshe, 2003 jylǵy 27 qarashada ýniversitet rektory bolǵan Toqmuhamed Sadyqov (1987–2008 jyldary qyzmet atqarǵan) affilirlengen Zýrab firmasy JShS-men (qazirgi ataýy – ST Advisory JShS) zańsyz satyp alý-satý kelisimin jasaǵan.
Oqý korpýsy sol kezde 5 070 250 teńgege satylǵan.
Anyqtama úshin: prokýratýranyń habarlaýynsha, bul nysannyń 2026 jylǵy naryqtyq baǵalaý quny – 135 mln teńge.
Prokýratýra málimetinshe, memlekettik múlikti satý týraly sheshimdi ýákiletti organ emes, rektordyń ózi qabyldaǵan. Baǵalaý júrgizilmegen, konkýrs ótkizilmegen, al baǵa taraptardyń kelisimimen belgilengen.
Ýniversitet óz ǵimaraty úshin jaldaý aqy tólegen
Prokýratýranyń málimetinshe, sport korpýsy jekemenshikke ótkennen keiin ol qaitadan QazUPÝ-dyń ózine dene shynyqtyrý sabaqtaryn ótkizý úshin jalǵa berilgen.
Ǵimarat iesi bilim berý salasyna qatysy bolmaǵan jáne nysandy tek kommertsiialyq maqsatta paidalanǵan.
Kelisimshartqa sáikes, ýniversitet alǵashqy 30 ai boiy ai saiyn 1 mln teńge, keiin 2 mln teńge jaldaý aqy tólep otyrǵan.
Nátijesinde oqý orny jeke menshik ielerine óz ǵimaraty úshin 78 918 837 teńge tólegen.
Sonymen qatar, 2018 jyly «Zýrab firmasy» JShS men jeke kásipker Bekenova B. arasynda ai saiynǵy jaldaý aqysy 70 myń teńge bolatyn kelisim jasalǵan. Keiin bul nysan 2023 jylǵa deiin QazUPÝ-ǵa sporttyq jáne mádeni is-sharalar ótkizý úshin jalǵa berilgen.
Tek 2024 jylǵy sáýirde oqý korpýsyn satý jónindegi mámile sot sheshimimen jaramsyz dep tanylyp, ǵimarat ýniversitettiń menshigine qaitarylǵan.
Jataqhana janyndaǵy pavilon «týystaryna syiǵa berilgen»
Prokýratýra sondai-aq Qonaev kóshesinde ornalasqan, aýmaǵy 208,8 sharshy metr bolatyn pavilondy da memleket menshigine qaitardy. Vedomstvo dereginshe, bul nysan 1995 jyly eks-rektorǵa affilirlengen tulǵalarǵa tómen baǵamen satylǵan. Qazirgi naryqtyq quny 140 mln teńge dep baǵalanyp otyr.
Prokýratýranyń habarlaýynsha, keiingi satyp alý-satý mámileleri formaldy sipatta bolǵan. Nysan eks-rektordyń otbasymen bailanysty tulǵalar arasynda birneshe ret qaita satylyp, keiin jaqyn týystaryna syiǵa berilgen. Osylaisha múlik is júzinde memlekettik menshikten shyǵarylǵan.
Qazir bul pavilonda stýdenttik jataqhanaǵa jaqyn ornalasqan, alkogol ónimderin satatyn táýlik boiy jumys isteitin nysan qyzmet etedi.
Sot sheshimi
Prokýratýra barlyq bastapqy jáne keiingi mámilelerdi sot arqyly daýlaǵan. Sottar múlikti ielikten shyǵarý kezinde jekeshelendirý, jer jáne azamattyq zańnama talaptary buzylǵanyn anyqtaǵan.
Medeý aýdandyq sotynyń 2025 jylǵy 16 sáýirdegi sheshimimen prokýratýranyń talaby ishinara qanaǵattandyrylǵan. Al Almaty qalalyq sotynyń azamattyq ister jónindegi sot alqasy 2025 jylǵy 3 qyrkúiekte talaptardy tolyq kólemde qanaǵattandyrdy. Kassatsiialyq saty sot aktilerin ózgerissiz qaldyrǵan.
Nátijesinde memleket pen ýniversitettiń jyljymaityn múlikke qatysty quqyqtary qalpyna keltirildi.
Buǵan deiin Shyǵys Qazaqstan oblysynda Serikbaev atyndaǵy tehnikalyq ýniversitettegi memlekettiń úlesin zańsyz shyǵarý faktisi boiynsha tergeý aiaqtalǵan bolatyn.
