Qazaqstanda janarmai sapasyna qatysty daý kúsheiip, sońǵy bir aptada bir avtoserviske benzinnen keiin aqaýǵa ushyraǵan 50-den astam kólik kelgen, dep habarlaidy dalanews.kz.
Viton.kz avtoservisiniń málimetinshe, kólikterdiń basymynda birdei aqaý tirkelgen: qozǵaltqyshta Check Engine belgisi janǵan, kólik júrmei qalǵan, janarmai búrikkishteri isten shyqqan. Keibir kólikterde porshender kúiip ketken. Servis ókilderi bir kúnde osyndai máselemen shamamen 15 kólik keletinin, al WhatsApp arqyly 100-den astam ótinish túskenin aitty.
«Sońǵy bir aptada bizge birdei problemamen 50-den astam kólik keldi: qospa kedeilengen, Check Engine janyp tur, kólik júrmeidi, forsýnkalar isten shyqqan. Keibiriniń porshenderi kúiip ketken, keibiriniń forsýnkalary bitelip qalǵan. Qazir osy forsýnkalardy jóndep jatyrmyz. Kúnine shamamen 15 kólik keledi, WhatsApp-tyń ózine 100-den astam ótinish tústi. Munyń ne sebepti bolǵanyn bilmeimin. Qazaqstanǵa sapasyz janarmai kelgen bolýy múmkin», – dep málimdedi Viton.kz.
Másele buǵan deiin de kóterilgen. Buǵan deiin Saýda jáne integratsiia ministrligi avtomobil benzininiń sapasyn munai óńdeý zaýytynan bastap janarmai quiý stantsiialaryna deiingi búkil tizbek boiynsha zerttep jatqanyn habarlaǵan. Vedomstvoǵa azamattardan 12 ótinish túsken, sondai-aq Almaty, Almaty oblysy, Abai jáne Jambyl oblystaryndaǵy 17 AJS-dan baqylaý maqsatynda janarmai úlgileri alynǵan.
Sondai-aq habarlanǵandai, Quryltai depýtaty Ashat Rahymjanov Qazaqstanda sapasyz janar-jaǵarmai úlgileriniń úlesi edáýir ekenin málimdegen. Onyń aitýynsha, Almatyda AI-100 retinde satylǵan benzin quramyndaǵy kúkirt mólsheri ruqsat etilgen deńgeiden úsh eseden astam joǵary bolǵan. Al Qyzylorda oblysynda AI-95 markasymen AI-92 benzini satylǵan.
Buǵan deiin Astana men Almaty turǵyndarynyń da janarmai quiǵannan keiin kólikteri buzylǵany týraly shaǵymdary taraǵan. Avtokólik ieleri janarmai sorǵylarynyń isten shyǵýy, forsýnkalardyń bitelýi, qozǵaltqyshtyń turaqsyz jumys isteýi jáne kóliktiń avariialyq rejimge aýysýy siiaqty máselelerge tap bolǵanyn aitqan. Aitylǵandai, osyǵan bailanysty profildi vedomstvo janarmai sapasyn óndirýshiden bastap AJS-ǵa deiingi búkil tizbek boiynsha tekserip jatyr. Buǵan qosa, naryq qatysýshylary máseleniń shyǵý sebebine qatysty bir-birine siltep otyr.
