Shý turǵyny aialdamada tanysqan er adamdy óltirgeni úshin segiz jylǵa sottaldy. Áiel er adamnyń jynystyq zorlyq kórsetý áreketinen qorǵanǵanyn aitqan. Alaida sot onyń bul ýájin qabyldamai, áreketin qasaqana adam óltirý dep baǵalady, dep habarlaidy dalanews.kz.
Qaiǵyly oqiǵa mamyr aiynda bolǵan. Anar Nurymova men Ernar Buǵaev (esimderi ózgertilgen) aialdamada tanysyp, birneshe saǵattan keiin Shý aýdanyndaǵy Alǵa aýylynda ornalasqan jeke úige barǵan.
Aiyptaý tarapynyń nusqasy boiynsha, áńgimelesý kezinde er adam áielge ádepsiz usynys jasaǵan. Osydan keiin Nurymova aýlaǵa shyǵyp, tósemtastyń bir bóligin alyp, er adamnyń artynan kelip, basynan urǵan. Ol jerge qulaǵannan keiin áiel taǵy eki ret soqqy jasaǵan. Er adam alǵan jaraqattarynan oqiǵa ornynda kóz jumǵan.
Sot barysynda Nurymova er adamnyń aldyna jalańash shyqqanyn, jynystyq qatynasqa túsýge májbúrlegenin, uryp-soǵyp, tunshyqtyrǵanyn jáne óltiremin dep qorqytqanyn aitty.
Onyń sózinshe, tasty ózin qorǵaý úshin alǵan. Al er adam qaita turyp, taǵy shabýyl jasaidy dep qaýiptengendikten, keiingi eki soqqyny jasaǵan. Oqiǵadan soń áiel politsiia men jedel járdemdi ózi shaqyrǵan.
Alaida saraptama onyń denesinen jaraqat belgilerin anyqtamady. Buǵan deiin marqumǵa qatysty boljamdy zorlyq-zombylyq deregi boiynsha qozǵalǵan is qylmystyq quqyq buzýshylyq quramynyń bolmaýyna bailanysty toqtatylǵan.
Sot soqqylardyń jasalý retine erekshe mán berdi. Alǵashqy soqqydan keiin er adam jerge qulaǵanyna qaramastan, sottalýshy onyń basynan taǵy eki ret urǵan. Osyǵan bailanysty sot áieldiń áreketin qasaqana adam óltirý dep saralady.
Jaza taǵaiyndaý kezinde Nurymovanyń kinásin moiyndaýy, ókinýi, óz erkimen politsiiaǵa habarlasýy jáne bes balasynyń bolýy eskerildi. Onyń tórt balasy kámeletke tolmaǵan. Marqumnyń aǵasy áieldi keshiretinin aityp, odan ótemaqy talap etpedi.
Sot úkimimen Anar Nurymova qaýipsizdigi ortasha mekemede segiz jyl bas bostandyǵynan aiyrý jazasyna kesildi.
