Eks-ministr Rýslan Jaqsylyqov qamaýǵa alyndy, dep habarlaidy Dalanews.kz Ulysmediaǵa siltep.
"2025 jylǵy 10 maýsymda Qazaqstan Respýblikasynyń Qorǵanys ministri, general-polkovnik Rýslan Jaqsylyqov qamaýǵa alynyp, Astana qalasyndaǵy ýaqytsha ustaý izoliatoryna jetkizildi. Tergeý múddesine bailanysty ózge aqparat jariia etýge jatpaidy", - delingen habarlamada.
Buǵan deiin 8 maýsymda prezident Rýslan Jaqsylyqovty qorǵanys ministri qyzmetinen bosatqan bolatyn. Onyń ornyna Dáýren Qosanov Qorǵanys ministrligin basqarady.
Aita keteiik, buǵan deiin áskeri sarapshy, otstavkadaǵy polkovnik Ermek Seiitbattalov qorǵanys salasyna túbegeili ózgeris kerek ekenin málimdegen bolatyn.
Seiitbattalov Qazaqstandaǵy áskerdiń áleýetine, áýe qorǵanysyna qatysty pikir bildirdi. Sarapshy bul salany uiymdastyrý óte álsiz eken ekenin aitty.
"Meniń paiymdaýymsha, (áskerdiń áleýeti - esk.) búgingi zamannyń talabyna sai emes. Kóp jerde aityp júrmin, áskerge reforma kerek. Óte keń, óte tereń reforma kerek. 32 jylda 13 ministr (aýysty - esk.). 13 ministrdiń 30 paiyzy - azamat. Olardyń áskeri daiyndyqtan, áskeri bilimnen habary joq. Qalǵany, 9 ministr de (bul salaǵa - esk.) beiindi emes, olardyń bolǵan ýaqytyna qarasańyz, 32 jyldyń ishinde alty jarym jyl ǵana kásibi, áskeri ministrler bolǵan. Olarǵa da suraqtar bar. Sonda 20 paiyzy ǵana áskeriler bolǵan. Búgingi zamanda bizdiń qaýipsizdigimizdi (olardan - esk.) damyǵan elderdegi siiaqty, damyp jatqan elderdegi siiaqty suraýǵa bolmaidy. Nege deseńiz olardyń daiarlyǵy, uǵymy joq. Olar ondai jaýap bere almaidy.
(Áýe qorǵanysy - esk.) búgingi talapqa sai kelmeidi . San emes, sapa emes, uiymdastyrý jaǵy óte aqsap tur. Keibir men biletin óte jaqsy jigitter bar. Biraq olar júieniń ishinde júr, jeke tulǵalyq kózqarasyn kórsete almaidy. Kadrdan bastaý kerek. Kadrdy qoiatyn - basshylyq. Qorǵanys ministri, sonyń kabinetinde otyratyn adam ony biledi. Eldiń áskeri qorǵanysyn, ulttyq qaýipsizdigin bilip otyratyn, daiarlanǵan, bilikti adam kerek. Qazirgi qorǵanys ministrine kóńilim tolmaidy. Naqty aitpaimyn. (Sebebi - esk.) ofitserlik kodeks", - dedi ol Bilgen Durys arnasyna bergen suhbatynda.
Aita keteiik, eks-qorǵanys ministri Rýslan Jaqsylyqov 2021 jylǵy qyrkúiekten 2022 jyly qańtar aralyǵynda Ishki ister ministriniń orynbasary – Qazaqstan Respýblikasy Ulttyq ulanynyń bas qolbasshysy qyzmetin atqarǵan.
Al 2022 jylǵy 19 qańtardan bastap Qazaqstan Respýblikasynyń qorǵanys ministri laýazymyn atqardy.
