Májilis depýtaty bolǵan Baqytjan Bazarbekke qatysty birneshe jylǵa sozylǵan sot daýy qaita kún tártibine shyqty. Talapkerlerdiń aitýynsha, Bazarbek 2023 jyly shyqqan sot sheshimin áli kúnge deiin tolyq oryndamaǵan, dep habarlaidy dalanews.kz.
Oral qalasynyń №2 soty buǵan deiin Baqytjan Bazarbek taratqan málimetter Robert pen Janar Irmenovterdiń ar-namysyna, qadir-qasietine jáne iskerlik bedeline nuqsan keltiredi degen sheshim shyǵarǵan. Sot bul aqparattardy jala sipatyndaǵy málimetter dep tanyǵan.
Is materialdaryna sáikes, Bazarbek dálelsiz túrde talapkerlerdi zańsyz qurylys júrgizdi, sý qorǵaý aimaqtaryndaǵy jerlerdi ielendi jáne qurylys kompaniialarynyń múddesin qoldady dep aiyptaǵan. Bul málimdemeler buqaralyq aqparat quraldarynda, Facebook-tegi jazbalarynda jáne YouTube arnasyna bergen suhbattarynda jariialanǵan.
Sot Baqytjan Bazarbekke atalǵan aqparattardy jariia túrde joqqa shyǵaryp, talapkerlerge moraldyq shyǵyn úshin ótemaqy tóleýdi mindettegen.
Bazarbek 2026 jyldyń maýsym aiynda 150 myń teńge kólemindegi ótemaqyny tólegen. Alaida sot júktegen jariia túrde teristeý mindetin áli oryndamaǵany belgili boldy.
Talapkerlerdiń advokaty Svetlana Klioninanyń aitýynsha, onyń qorǵaýyndaǵy azamattar úshin qarjylai ótemaqydan góri Baqytjan Bazarbektiń kópshilik aldynda óz málimdemesiniń shyndyqqa sáikes kelmeitinin moiyndaýy mańyzdy. Soǵan qaramastan, onyń sózinshe, Baqytjan Bazarbek sot sheshiminiń osy bóligin oryndaýdan jaltaryp keledi.
