Ekonomikalyq ósimdi yntalandyrýǵa 240 mlrd. teńge bólinetin boldy
Memleket basshysy ótken kezeńde atqarylǵan jumys reformalardy tikelei júzege asyrý úshin qolaily ahýal qalyptastyrǵanyn atap ótti.
– Biz jariialaǵan bes institýtsionaldyq reforma – jańa ekonomikalyq jaǵdaidaǵy keshendi damý jospary. Ult josparyn sapaly júzege asyrý - bizdiń eń basty mindetimiz. Osy kezeń ishinde aýqymdy jumys atqaryldy. Úkimet qajetti zańdar, tiisti normativtik quqyqtyq aktiler qabyldady, memlekettik qyzmettiń meritokratiia qaǵidattaryna negizdelgen mansaptyq modeli engizildi, sot tóreliginiń úshbýyndy júiesine kóshý iske asyryldy, Joǵarǵy sot janyndaǵy Halyqaralyq keńes jumysyna kiristi, sýdialarǵa qoiylatyn biliktilik talaptary kúsheitildi. Budan bólek, salyq jáne keden saiasatyn jetildirý jónindegi jumys júrgizilýde, aýqymdy jekeshelendirý isi bastaldy, eldi indýstriialandyrýdyń ekinshi kezeńi júrip jatyr, áleýmettik saiasat jetildirilýde, memlekettiń eseptiligi arttyrylýda. Jalpy, búginde júz qadamnyń 23-i tolyq oryndaldy, – dedi Qazaqstan Prezidenti.
Sondai-aq Nursultan Nazarbaev qazirgi sátte jurtyshylyqpen saýatty jumys júrgizý isin jolǵa qoiýǵa erekshe kóńil bólgen jón ekenin aitty.
– Jańa zańnamalyq aktiler qabyldaý nátijesinde birqatar kemshilikter men olqylyqtar anyqtalyp jatyr. Sonyń aiqyn mysaly – jer máselesine qatysty zań. Sondyqtan júieli taldaý jáne qabyldanyp jatqan sharalardy jan-jaqty talqylaý negizinde qateliktermen udaiy jumys júrgizip otyrý qajet. Biz saiasatymyzdy jetildirý jóninde aldyn ala júieli qadamdar jasaýǵa tiispiz, – dedi Memleket basshysy.
Jiyn barysynda jumys toptarynyń músheleri Ulttyq komissiianyń qazirgi qyzmeti týraly baiandama jasady.
Keńes qorytyndysy boiynsha Qazaqstan Prezidenti ekonomikalyq ósimdi yntalandyrý úshin Úkimetke 2016 jyldyń ekinshi jartysynda qosymsha 240 mlrd teńge bólýdi tapsyrdy. Memlekettik biýdjetten qarajatty únemdeý esebinen bólinetin resýrstar shaǵyn jáne orta biznesti qoldaýǵa, jeke turǵyn úi qurylysy baǵdarlamasyn nesieleý men júzege asyrý isine jumsalady. Budan bólek, qarjy birqatar infraqurylymdyq jobalardy iske asyrýǵa, sonyń ishinde aýyldyq eldi mekenderdegi turmys sapasyn jaqsartýǵa, Quryq portyndaǵy parom ótkelin aiaqtaýǵa jáne elorda áýejaiyn jańǵyrtýǵa bólinedi. Bul sharalar qurylys salasynda 20 myń jańa jumys ornyn ashýǵa múmkindik berip, ekonomikalyq ósim qarqynyn jedeldetýge septigin tigizedi. Qabyldanyp jatqan sharalardyń tiimdiligi 2016 jylǵa josparlanǵan ekonomikalyq ósim deńgeiine qosymsha 0,4 % bolady dep boljanýda.
Keńeske Premer-Ministr K.Másimov, Prezident Ákimshiliginiń Basshysy N.Nyǵmatýlin, Premer-Ministrdiń orynbasary D.Nazarbaeva, Prezident Ákimshiligi basshysynyń orynbasary B.Mailybaev, Prezident Ákimshiligi basshysynyń orynbasary M.Beketaev, Joǵary Sot Keńesiniń tóraǵasy A.Smolin, Prezidentttiń kómekshisi Á.Smaiylov, Memlekettik qyzmet isteri ministri T.Donaqov, Investitsiia jáne damý ministri Á.Isekeshev, Ulttyq ekonomika ministri Q.Bishimbaev, Bilim jáne ǵylym ministri E.Saǵadiev, Astana qalasynyń ákimi Á.Jaqsybekov qatysty.
Derekkózi: «Qazaqparat»
