Bki burynǵy vıse-mınıstr men «Birinshi kredıttik búronyń» basshysyna qatysty rezonans týdyrǵan is boıynsha tergeý aıaqtalǵan. Endi qylmystyq is materıaldary sotqa joldanady. Tergeý nusqasyna sáıkes, memleketke keltirilgen shyǵyn 2 mıllıard teńgege baǵalanǵan, dep habarlaıdy Dalanews.kz.
Jýrnalıs Mıhaıl Kozachkovtyń málimetinshe, ótken jyldyń jazynda Qazaqstannyń qarjy sektorynda «Birinshi kredıttik búro» kompanıasynyń bas dırektory Rýslan Omarovtyń ustalǵany týraly aqparat keńinen taraǵan edi. Onymen birge Eńbek jáne halyqty áleýmettik qorǵaý mınıstrliginiń burynǵy eki vıse-mınıstri - Dáýlet Arǵyndyqov pen Aqmádı Sarbasov ta qamaýǵa alynǵan. Olardy iri kólemdegi aqsha berý sátinde ustaǵany aıtylǵan. Tergeý málimetinshe, Omarov sheneýnikterge 75 myń dollar aparǵan.
Tergeý nusqasy boıynsha, bul qarajat «Birinshi kredıttik búro» men Eńbek jáne halyqty áleýmettik qorǵaý mınıstrligine qarasty enshiles uıym - «Eńbek resýrstaryn damytý ortalyǵy» AQ arasyndaǵy yntymaqtastyqtyń zańsyz bóligi aıasynda berilgen. Bul uıym qazaqstandyqtardyń tabysy týraly barlyq málimetti jınaıdy. Al mundaı aqparat nesıe berý kezinde klıenttiń tólem qabiletin baǵalaý úshin asa mańyzdy sanalady. Bankter men qarapaıym azamattar bul málimetterdi «Birinshi kredıttik búro» jáne Memlekettik kredıttik búro arqyly alady.
Sonymen qatar, «Birinshi kredıttik búro» atalǵan ortalyqpen resmı túrde, qol qoıylǵan kelisimder negizinde jumys istegen. Biraq bul jaǵdaıda ortalyq basshylyǵyna ne úshin para berilgeni tergeý barysynda basty suraqtardyń birine aınalǵan.
Qarjylyq monıtorıń agenttiginiń dereginshe, 2020 jyly ortalyqtyń sol kezdegi basshysy Dáýlet Arǵyndyqov «Birinshi kredıttik búronyń» bas dırektory Rýslan Omarovpen zańsyz kelisim jasasqan. Sonyń nátıjesinde jekemenshik kompanıa kórsetilgen qyzmetten túsken tabystyń 35 paıyzyna deıin alyp otyrǵan. Al dál osy salada jumys isteıtin Memlekettik kredıttik búro 30 paıyz ǵana tabys taba alǵan. Tergeý málimetine súıensek, mundaı kelisimniń kesirinen «Eńbek resýrstaryn damytý ortalyǵynyń» óz tabysy azaıǵan.
Sondaı-aq Qarjylyq monıtorıń agenttigi Arǵyndyqov ortalyqqa suranystardy kidirissiz ári kóp kólemde óńdeýge múmkindik beretin aqparattyq servıstiń ornatylýyn maquldady dep kúdiktenedi. Bir qaraǵanda, munda zańsyz eshteńe joq sıaqty.
Alaıda tergeý nusqasyna sáıkes, «Eńbek resýrstaryn damytý ortalyǵy» men Memlekettik kredıttik búrony baılanystyratyn aqparattyq arnalarǵa júıeniń jumysyn baıaýlatatyn zıandy baǵdarlama ádeıi engizilgen. Sonyń saldarynan «Birinshi kredıttik búro» azamattardyń tólem qabileti týraly málimetti alýda basymdyqqa ıe bolǵan. Demek, qyzmettiń jyldamdyǵyna baılanysty klıentter osy búroǵa kóbirek júgingen.
İste ekinshi burynǵy vıse-mınıstr Aqmádı Sarbasovtyń da róli kórsetilgen. Ótken jyldyń kókteminde ol Dáýlet Arǵyndyqovtyń ornyna «Eńbek resýrstaryn damytý ortalyǵy» AQ prezıdenti bolyp taǵaıyndalyp, aldyńǵy basshy bekitken sharttarmen «Birinshi kredıttik búro» basshylyǵymen jumysty jalǵastyrǵan. Tergeý málimetinshe, iri kólemdegi qolma-qol aqsha sonyń úshin berilgen.
Osyǵan baılanysty Aqmádı Sarbasovqa para alý jáne qyzmettik ókiletin asyra paıdalaný baptary boıynsha aıyp taǵylǵan. Al onyń áriptesi Dáýlet Arǵyndyqovqa qyzmettik ókiletin asyra paıdalaný, para berý jáne zıandy baǵdarlamalyq jasaqtama ornatý aıyptary taǵylyp otyr. «Birinshi kredıttik búronyń» bas dırektory Rýslan Omarovqa qyzmet babyn asyra paıdalanýǵa qatysqany jáne para bergeni úshin aıyp taǵylǵan.
Quqyq qorǵaý organdarynyń esebinshe, ortalyqqa keltirilgen jalpy shyǵyn kólemi 2 mıllıard teńgege jetken. Qylmystyq is fıgýranttarynyń 1 mıllıard teńgeniń múlkine tyıym salynǵan.
