Dimash, sen toidyń ánshisi emessiń
Kómeiine bulbul uialaǵan qazaqtyń jeztańdai oǵlany Dimash Qudaibergenovtyń áýezdi áýenine bul kúnde álem qulaq túredi. Iá, onyń án álemindegi qubylys ekendigin bútkil óner súier qaýym túgel moiyndady. Bul dańq tuǵyryna kóteriler baspaldaq negizi óz otbasynda, qazaq dalasynda qalansa da biz qashanǵymyzdai bir týar talant iesi jolyna kóldeneń jatyp aldyq. Sodan bolar, Dimashtyń da, qazaq ániniń de dańqyn asqaqtatqan "Dáididaý" áni áýeli ózimizde shyrqalǵanymen, shynaiy baǵasyn shetelden aldy. Biz sonda da selt etpedik.
Óz qarym-qabiletin ózgeden góri ózi jaqsy biletin Dimash toi "juldyzdaryna" ainalǵan áriptesteriniń synyna pysqyryp ta qaramai, óz baǵyn synaý maqsatynda Qytaida ótetin xalqaralyq "Men ánshimin" baiqaýyna attanyp ketti. Bardy da... Iá. "Aidy aspanǵa bir-aq shyǵardy".
Endi osy oiǵa shamaly filosofiialyq mán berip kórelik. Oi uǵynyqtylyǵy úshin aspanǵa shyqqan "aidy" talant dep qabyldaiyq. Shyntýaityna kelgende ol "ai" áý bastan bar edi. Tek qudyqtyń túbinde eleýsiz jatyr edi dá. Bul jerdegi "qudyqty" memleket demei-aq qoialyq, biraq sol júiege baǵynyshty búgingi qazaqtyń án saxnasy dep qabyldaǵan jón shyǵar. Al "qudyq" "aidyń" aspanǵa shyǵýyna múddeli emes. Sondyqtan bizdiń oǵlanǵa basqa "qudyq", iaǵni ózge saxna qajet boldy. Al ol kórshi Qytai elinen tabyldy.
Dimash qazir dańq tuǵyryna kóterildi. Onyń juldyzy qazaqtyń ǵana emes, álem nazary túser talai talant armandap, tek elesin ǵana talmaǵan sonaý shyrqaý biikte jandy. Ol qazir eshqandai qurmetke de, qoshametke de muqtaj emes. Ol ózi aitqandai, jeńis tuǵyryna kóterilip qoidy. Bul jeńis Dimashqa ózi syndy tańdaýlylar ǵana án salatyn álemdik juldyzdy saxnalarǵa jol ashty. Oǵan endigi jerde qazaqtyń "toi saxnasy" men teledidardaǵy "toi-shoý" baǵdarlamalar tarlyq etedi.
"Maqtansa búgin maqtansyn qazaq..." deitin án bolýshy edi ǵoi. Sol aitpaqshy, Dimash bizdiń maqtanyshymyz. Al "Men ánshiminniń" júldesine kelsek... KSRO kezinde "Biz tyńdy kóterdik, tyń - bizdi kóterdi" deýshi edik qoi. Osy mátelge ainalǵan sózdi "Men ánshiminge" de qatysty aitýǵa bolady. Qudaishylyǵyn aitsaq, buryn bar joǵy belgisiz bul án baiqaýyna álem jurtshylyǵynyń nazaryn aýdarǵan bizdiń Dimash. Qazir Dimash ol baiqaý júldesinen joǵary kóterilip ketti.
Áitse de týǵan el qurmeti óz aldyna bir tóbe. Sondyqtan ýaqyty kelip turǵan kezde memleketimiz de utymdy qadam jasap, Dimashtai bir týar ulyn "Eńbek Eri" ataǵymen marapattaýy tiis. Bilgen jón. Talant jaspen ólshenbeidi. Al joǵary marapatty jasyna qarap beretin bolsaq, onda odan úmittiler bizde jetip artylady. Onyń ústine kezinde KSRO-dai alpaýyt memlekettiń ózi ne bári 24 jastaǵy Kúlásh Báiseiitovaǵa KSRO xalyq ártisi ataǵyn bergen. Al biz táýelsiz elmiz ǵoi... Bul usynys bilikten de, xalyqtan da qoldaý tabady dep oilaimyn.
