Elimizde biylǵy 1 qyrkúiekten bastap shaǵyn jinaqty mektepterge jasandy intellektini engizý boiynsha pilottyq joba iske qosyldy, dep habarlaidy dalanews.kz.
Bul Prezident Qasym-Jomart Toqaevtyń «Jasandy intellekt dáýirindegi Qazaqstan: ózekti máseleler jáne ony túbegeili tsifrlyq ózgerister arqyly sheshý» atty Qazaqstan halqyna Joldaýynda bilim alýshylardyń mektep qabyrǵasynan bastap jasandy intellekt salasyndaǵy quzyretterin damytýǵa qatysty bergen tapsyrmalaryna sáikes júzege asyrylýda.
Pilottyq joba Pavlodar jáne Qyzylorda oblystarynda ornalasqan elimizdiń alǵashqy 10 mektebin qamtidy. Joba sheńberinde 4-synypta oqityn 50-den astam oqýshy matematika, tsifrlyq saýattylyq, qazaq tili jáne orys tili pánderi boiynsha oqytý uiymdastyryldy. Atalǵan joba – 2026–2029 jyldarǵa arnalǵan orta bilim berý júiesine jasandy intellektini engizý jónindegi keshendi jospardy júzege asyrý sharalarynyń bir bóligi.
Mańyzdy kezeńderdiń biri jýyrda Úrimshi (QHR) qalasynda qazaqstandyq Q.AI jasandy intellekt kompaniiasy men álemdik deńgeidegi jasandy intellekt salasynyń sarapshysy, Qazaqstan Respýblikasy Prezidenti janyndaǵy Jasandy intellekt jónindegi keńestiń múshesi Li Kai-Fý negizin qalaǵan halyqaralyq 01.AI kompaniiasy arasynda jobany kezeń-kezeńimen keńeitý týraly kelisimge qol qoiylýy boldy.
Joba kezeń-kezeńimen keńeitiledi:
2027 jylǵy qańtarda qatysýshy mektepterdiń sanyn keminde 50-ge deiin kóbeitý josparlanýda;
sáýirde 440-qa deiin;
2028 jyldyń shildesine qarai elimizdiń 2,6 myńǵa jýyq shaǵyn jinaqty mektepteri tolyq qamtylmaq.
Oqý protsesi qashyqtan oqytý tehnologiialaryn qoldana otyryp, gibridti model boiynsha qurylǵan: pedagogter «Órleý» ulttyq biliktilikti arttyrý ortalyǵynyń bazasynda arnaiy jabdyqtalǵan stýdiiadan onlain rejimde sabaq ótkizedi. Bul ýaqytta aýyldyq synyptarda jergilikti muǵalimder sabaq barysynda balalarǵa materialdy igerýge birge kómektesedi, al oqýshylardyń belsendiligi men qatysýyn baqylaý interaktivti klikerler men tsifrlyq quraldardyń kómegimen júzege asyrylady.
Sonymen bir mezgilde pedagogterdi, mektep basshylaryn jáne aýdandyq bilim bólimderiniń mamandaryn daiarlaý jalǵasady.
«Ulttyq aqparattyq tehnologiialar» AQ-nyń bazasynda otandyq sýperkompiýterlik klasterdiń esepteý qýattaryn paidalanatyn JI-platformanyń tehnologiialyq negizi ornalastyrylǵan.
Q.AI kompaniiasynyń bas direktory Dmitrii Mýn birlesken joba qala men aýyl oqýshylary arasyndaǵy bilim sapasyndaǵy alshaqtyqty joiýǵa arnalǵanyn atap ótti.
«Qazaqstanda aýyldyq jerlerde shamamen 2,6 myń shaǵyn jinaqty mektep bar. Olarda ár synypta 5–6 oqýshydan bilim alady. Ár pán boiynsha bilikti pedagogterdi tartýǵa barlyq jerde múmkindik bola bermeidi. Bizdiń joba – osy mindetti iske asyrýǵa baǵyttalǵan praktikalyq qadamdardyń biri. Astananyń bilikti muǵalimderi aýyl mektepterine onlain formatta tikelei sabaq ótkizedi. Sonymen qatar synyptaǵy muǵalim balalardyń janynda, al JI oqýshylardyń jaýaptaryn taldaidy, bilimdegi olqylyqtar men álsiz jaqtardy tabýǵa jáne kimge qosymsha kómek qajet ekenin aiqyndaýǵa kómektesedi. Iaǵni, biz derbes bilim berý modeline kóship jatyrmyz. Bul rette jasandy intellekt muǵalimdi almastyrmaidy, kerisinshe onyń múmkindigin arttyryp, jumysyn tiimdi etedi. Búginde Qazaqstannyń eń shaǵyn mektepterinde eldiń bolashaq ǵalymdary, kásipkerleri, memlekettik qyzmetshileri men tehnologiialyq kóshbasshylary bilim alyp ósip keledi. Dál osyndai jobalar úshin Qazaqstan men Qytai búginde tehnologiialardy, tájiribe men adamdardy biriktiredi», — dep atap ótti Dmitrii Mýn.
Qashyqtan oqytý men jasandy intellektini ushtastyrý aýyl oqýshylarynyń zamanaýi bilim berý resýrstaryna qoljetimdiligin keńeitip, neǵurlym derbes oqytý tásilin qamtamasyz etýge jáne turǵylyqty jerine qaramastan balalarǵa sapaly bilim alýǵa teń múmkindik jasaýǵa jol ashady. Sonymen qatar joba muǵalimder men oqýshylardyń tsifrlyq quzyrettiligin damytýǵa yqpal etýi kerek.
