كومەيىنە بۇلبۇل ۇيالاعان قازاقتىڭ جەزتاڭداي وعلانى ديماش قۇدايبەرگەنوۆتىڭ اۋەزدى اۋەنىنە بۇل كۇندە الەم قۇلاق تۇرەدى. ءيا، ونىڭ ءان الەمىندەگى قۇبىلىس ەكەندىگىن بۇتكىل ونەر سۇيەر قاۋىم تۇگەل مويىندادى. بۇل داڭق تۇعىرىنا كوتەرىلەر باسپالداق نەگىزى ءوز وتباسىندا، قازاق دالاسىندا قالانسا دا ءبىز قاشانعىمىزداي ءبىر تۋار تالانت يەسى جولىنا كولدەنەڭ جاتىپ الدىق. سودان بولار، ديماشتىڭ دا، قازاق ءانىنىڭ دە داڭقىن اسقاقتاتقان "ءدايديداۋ" ءانى اۋەلى وزىمىزدە شىرقالعانىمەن، شىنايى باعاسىن شەتەلدەن الدى. ءبىز سوندا دا سەلت ەتپەدىك.
ءوز قارىم-قابىلەتىن وزگەدەن گورى ءوزى جاقسى بىلەتىن ديماش توي "جۇلدىزدارىنا" اينالعان ارىپتەستەرىنىڭ سىنىنا پىسقىرىپ تا قاراماي، ءوز باعىن سىناۋ ماقساتىندا قىتايدا وتەتىن xالقارالىق "مەن ءانشىمىن" بايقاۋىنا اتتانىپ كەتتى. باردى دا... ءيا. "ايدى اسپانعا ءبىر-اق شىعاردى".
ەندى وسى ويعا شامالى فيلوسوفيالىق ءمان بەرىپ كورەلىك. وي ۇعىنىقتىلىعى ءۇشىن اسپانعا شىققان "ايدى" تالانت دەپ قابىلدايىق. شىنتۋايتىنا كەلگەندە ول "اي" ءاۋ باستان بار ەدى. تەك قۇدىقتىڭ تۇبىندە ەلەۋسىز جاتىر ەدى ءدا. بۇل جەردەگى "قۇدىقتى" مەملەكەت دەمەي-اق قويالىق، ءبىراق سول جۇيەگە باعىنىشتى بۇگىنگى قازاقتىڭ ءان ساxناسى دەپ قابىلداعان ءجون شىعار. ال "قۇدىق" "ايدىڭ" اسپانعا شىعۋىنا مۇددەلى ەمەس. سوندىقتان ءبىزدىڭ وعلانعا باسقا "قۇدىق"، ياعني وزگە ساxنا قاجەت بولدى. ال ول كورشى جۇڭگو ەلىنەن تابىلدى.
ديماش ءقازىر داڭق تۇعىرىنا كوتەرىلدى. ونىڭ جۇلدىزى قازاقتىڭ عانا ەمەس، الەم نازارى تۇسەر تالاي تالانت ارمانداپ، تەك ەلەسىن عانا تالماعان سوناۋ شىرقاۋ بيىكتە جاندى. ول ءقازىر ەشقانداي قۇرمەتكە دە، قوشامەتكە دە مۇقتاج ەمەس. ول ءوزى ايتقانداي، جەڭىس تۇعىرىنا كوتەرىلىپ قويدى. بۇل جەڭىس ديماشقا ءوزى سىندى تاڭداۋلىلار عانا ءان سالاتىن الەمدىك جۇلدىزدى ساxنالارعا جول اشتى. وعان ەندىگى جەردە قازاقتىڭ "توي ساxناسى" مەن تەلەديدارداعى "توي-شوۋ" باعدارلامالار تارلىق ەتەدى.
"ماقتانسا بۇگىن ماقتانسىن قازاق..." دەيتىن ءان بولۋشى ەدى عوي. سول ايتپاقشى، ديماش ءبىزدىڭ ماقتانىشىمىز. ال "مەن ءانشىمىننىڭ" جۇلدەسىنە كەلسەك... كسرو كەزىندە "ءبىز تىڭدى كوتەردىك، تىڭ - ءبىزدى كوتەردى" دەۋشى ەدىك قوي. وسى ماتەلگە اينالعان ءسوزدى "مەن انشىمىنگە" دە قاتىستى ايتۋعا بولادى. قۇدايشىلىعىن ايتساق، بۇرىن بار جوعى بەلگىسىز بۇل ءان بايقاۋىنا الەم جۇرتشىلىعىنىڭ نازارىن اۋدارعان ءبىزدىڭ ديماش. ءقازىر ديماش ول بايقاۋ جۇلدەسىنەن جوعارى كوتەرىلىپ كەتتى.
ايتسە دە تۋعان ەل قۇرمەتى ءوز الدىنا ءبىر توبە. سوندىقتان ۋاقىتى كەلىپ تۇرعان كەزدە مەملەكەتىمىز دە ۇتىمدى قادام جاساپ، ديماشتاي ءبىر تۋار ۇلىن "ەڭبەك ەرى" اتاعىمەن ماراپاتتاۋى ءتيىس. بىلگەن ءجون. تالانت جاسپەن ولشەنبەيدى. ال جوعارى ماراپاتتى جاسىنا قاراپ بەرەتىن بولساق، وندا ودان ۇمىتتىلەر بىزدە جەتىپ ارتىلادى. ونىڭ ۇستىنە كەزىندە كسرو-داي الپاۋىت مەملەكەتتىڭ ءوزى نە ءبارى 24 جاستاعى كۇلاش بايسەيىتوۆاعا كسرو xالىق ءارتىسى اتاعىن بەرگەن. ال ءبىز تاۋەلسىز ەلمىز عوي... بۇل ۇسىنىس بيلىكتەن دە، xالىقتان دا قولداۋ تابادى دەپ ويلايمىن.
