5 qazanda Niý-Iorktiń áigili Madison Square Garden arenasynda alǵash ret Qazaqstannyń Ánurany shyrqaldy. Myńdaǵan kórermen alǵash ret TMD elinen shyqqan ártis – Dimash Qudaibergenniń jeke kontsertin tamashalady, dep habarlaidy Dalanews.kz.
"Bala kezimnen bul sahnada óner kórsetýdi armandaitynmyn. Sebebi meni bala kúnimnen boks álemindegi ańyz tulǵalar Muhammed Áli men Maik Taison shabyttandyrdy. Dál osy sahnada "úsh tenor", Maikl Djekson, Ýitni Hiýston, Selin Dion jáne Andrea Bochelli syndy juldyzdar óner kórsetti. Sońǵy jyldary ómirimde kóptegen mańyzdy oqiǵalar boldy, álemniń túkpir-túkpirinde úlken kontsertter ótkizdim, biraq bul jerde erekshe tarih jazylady", – dedi Dimash kontsert qarsańynda.
Bul sózder shyndyqqa ainaldy. Halyq ártisi Dimash Qudaibergen bastaǵan qazaqstandyq komanda tarihqa engen erekshe oqiǵanyń kýási boldy.
Dimashtyń "Stranger" baǵdarlamasy – onyń barlyq shyǵarmashylyǵy siiaqty túrli stilder men tilderdiń, janrlar men mýzykalyq baǵyttardyń toǵysy.
Kontsert jarqyn áser qaldyrǵan "Golden" ánimen ashyldy. Keiin Dimash aǵylshyn tilinde "Smoke", italian tilinde "Olimpico" jáne qytai tilinde "Battle of Memory" kompozitsiialaryn oryndady.
Madison Square Garden – Dimash úshin jańa baǵyndyrylǵan beles. Keshte alǵash ret "Love’s not over yet" týyndysy oryndaldy. Ándi avtordyń ózi, eki márte "Gremmi" júldegeri Ýolter Afanasev fortepianomen súiemeldedi.
"Men Dimashty biletinmin, biraq onyń barlyq shyǵarmalaryn tyńdap kórmeppin. Alaida ony jandy daýyspen tyńdaýdyń áseri bólek. Ol zaldaǵy bar adamdy shabyttandyryp, júrekterge áser etedi. Kórermender ony erekshe jaqsy kóredi – mundai yqylasty sirek kóremin. Kontsert boiy: "Myna ándi kim jazǵan?" – dep suradym. "Dimash". "Al mynaý she?" – "Taǵy da Dimash". Bul men úshin umytylmas áser boldy. Men bul sahnada birneshe ret óner kórsettim, biraq dál mundai áserdi sezingen emespin. Bul – úlken mártebe. Óte baqyttymyn", – dedi Ýolter Afanasev.
Máńgilik mahabbat taqyrybyn jalǵastyrǵan Dimash jaqyn dosy, kompozitor Igor Krýtoidyń "Liýbov ýstavshih lebedei" ánin oryndady. 2019 jyly Qazaqstandaǵy "Arnaý" kontsertinen bastalǵan dástúr boiynsha, kórermender bul joly da ánniń qaiyrmasyn birneshe ret birge aitty.
"Sos D’un Terrien En Détresse" shyǵarmasyn oryndamas buryn Dimash tyńdarmandaryna BUU-nyń Halyqaralyq kóshi-qon uiymynyń aimaqtyq izgi niet elshisi retinde ún qatty:
"Qurmetti dostar, mýzyka bizdi biriktire alady. Búgin keshke biz muny birge istei alamyz. Meniń artymdaǵy ekranda QR-kod kórsetiledi. Ony skanerlep, BUU kóshi-qon agenttigine qoldaý bildire alasyzdar jáne álem boiynsha adamdarǵa kómek kórsete alasyzdar. Birge biz bul álemdi jaqsyraq ete alamyz. Sizderge alǵys aitamyn. Al endi mýzykanyń ózi bizge jol kórsin".
Osydan keiin Dimash tyńdarmandaryna óz ánderi – "Umytylmas Kún", "Give Me Your Love", "Be With Me" kompozitsiialaryn oryndady. Ol zalmen birge úsh daýyspen án shyrqady. Kórermender sol keshte bar júregin, energiiasyn sahnadaǵy ártistermen birge bólisti. Búkil stadion bir yrǵaqta án aitty.
"Búgin tarihi kún. Dimash jańa sahnany baǵyndyrdy, alty jyl úzilisten keiin Niý-Iorkke triýmfpen oraldy. Osy jyldar ishinde ol da, biz de ózgerdik. Kórermender de bul ózgeristi sezdi", – dedi Zarina Bojakova.
Baǵdarlamanyń kelesi bóligi Dimash pen dombyrashylar Temirlan Oljabai men Ernat Naýryz oryndaǵan "Adai" kúiimen bastaldy.
Jańa "Taý ishinde" hitinen keiin Dimash jańa týyndynyń premerasyn jariialady. Adamnyń sheksiz múmkindigin beineleitin beine qatardyń aiasynda ol Jarasqan Nurbaidyń sózine jazylǵan týǵan jerge arnalǵan jańa qazaqsha avtorlyq áni – "Samǵaýdy" usyndy.
Premeradan keiin sahnada qýatty daýyspen jáne áserli energiiamen "Fire" kompozitsiiasy oryndaldy.
"Bul óte mańyzdy sát. Eń aldymen men kórgenim – lyq toly stadion. Men Qazaqstannan emespin, biraq Dimash úshin maqtandym. Onyń mýzykasy men tulǵasy shekaradan asyp, túrli ult ókilderin biriktiredi. Bul men úshin ómir boiy este qalar áser", – dedi Dmitrii Gordo.
Budan keiin Dimash sahna syrtynda kórindi. Kórermender kelesi beine úzindige daiyndalyp otyrǵanda, ekranda Dimashtyń ózi qaita paida bolyp, komandasymen birge Madison Square Garden dálizderimen júgirip ótip, jańa aǵylshyn tilindegi avtorlyq áni "Living For The Game"-di oryndady.
Kontsert "When I`ve Got You", "Weekend" jáne "Mahabbat Ber Maǵan" ánderimen jalǵasty.
Sol keshte Dimash pen onyń mýzykant dostary dombyra, sybyzǵy jáne qobyz sekildi dástúrli qazaq aspaptaryn kórermenge tanystyrdy. Qobyzda oinaǵan Oljas Qurmanbek týrdyń ataý áni – "Stranger"-de jeke partiia oryndady.
"Biz bul kontserttiń halqymyzdyń tarihy siiaqty altyn áriptermen jazylatynyna senemiz. Sebebi dombyra, qobyz jáne sybyzǵy sekildi qasietti aspaptar álemdik sahnada shyrqalsa, bul – ulttyq ónerimizdiń jańa biik deńgeige kóterilgeni. Munyń bári Dimashtyń arqasy. Biz qazaqtyń dástúrli mýzykalyq murasyn álemge tanytyp jatyrmyz", – dedi Temirlan Oljabai men Ernat Naýryz.
Shoýdyń finalynda "El Amor En Ti" jáne "The Story Of One Sky" shyǵarmalary oryndaldy.
Úsh saǵatqa sozylǵan kontsert Dimashtyń "Dúrdaraz" ánimen aiaqtaldy. Baǵdarlamany qorytyndylaǵan Dimash komandasyn tanystyryp, kórermenderdi 8 qazanda Meksikada ótetin kelesi kontsertine shaqyrdy.
