QR Tsifrlyq damý, innovatsiialar jáne aeroǵarysh ónerkásibi ministrligi Pavel Dýrovtyń Frantsiiada ustalýyna bailanysty Astanada Telegram keńsesin ashý múmkindigine qatysty pikir bildirdi, dep habarlaidy Dalanews.kz.
Vedomstvonyń málimdeýinshe, keńseniń ashylýy tikelei kompaniianyń óz sheshimine bailanysty. Sonymen qatar ministrlik jetekshi tehnopark retinde Astana Hub qajetti infraqurylymdyq qoldaý kórsete alatynyn atap ótti.
Eger Telegram keńsesi ashylatyn bolsa, ondaǵy jumys oryndarynyń sany kompaniianyń biznes strategiiasyna sai anyqtalmaq.
“Qazaqstan joǵary bilikti mamandar men básekege qabiletti eńbek jaǵdailaryn usyna otyryp, halyqaralyq IT-kompaniialar úshin qolaily ekojúie qalyptastyrýda”, — delingen resmi habarlamada.
Eske salaiyq, Pavel Dýrov tamyzdyń 25-ine qaraǵan túni Ázerbaijannan jeke ushaqpen kele jatqanda ustaldy. 26 tamyzda Parij prokýratýrasy Telegram platformasy arqyly jasalǵan qylmystarǵa qatysty shilde aiynda qylmystyq is qozǵalǵanyn habarlady.
Keiin onyń Frantsiia aýmaǵynan shyǵa almai otyrǵany týraly aqparat tarady. Onyń isi sotqa bir jyldan keiin jetýi múmkin. Bul týraly Wired jýrnaly frantsýz prokýratýrasynyń ókili Mailis de Rekke silteme jasap habarlady.
De Rek bul másele boiynsha qandai da bir beibit kelisim jasaýǵa áli erte ekenin atap ótti.
Prokýrordyń aitýynsha, Dýrovqa order berý týraly sheshim prokýratýra Telegram-nyń quqyq qorǵaý organdarynyń suranystaryna jaýap bermei, túrli departamenttegi tergeýlerdiń tyǵyryqqa tirelýine sebep bolǵanyn túsingennen keiin qabyldaǵan. Frantsiia biligi kásipkerdiń únsizdigin “qylmysqa sybailas qatysy bar” dep teńestirdi.
Libération basylymynyń málimetine súiengen Wired jýrnalynyń jazýynsha, 2013 jyldan 2024 jylǵa deiingi aralyqta frantsýz jandarmeriiasy Telegram-ǵa jiberilgen 2460 resmi suranystyń jaýapsyz qalǵanyn anyqtaǵan.
Telegram-nyń syrtqy jáne úkimettik bailanystar bólimin basqarǵan Iýliia Konli Dýrovty platformanyń ishindegi oqiǵalar úshin jaýapty dep sanaý qisynsyz ekenin málimdedi. Onyń pikirinshe, bul jaǵdai kontent moderatsiiasy salasyndaǵy mamandardyń tapshylyǵymen bailanysty.
