ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى پاۆەل دۋروۆتىڭ فرانسيادا ۇستالۋىنا بايلانىستى استانادا Telegram كەڭسەسىن اشۋ مۇمكىندىگىنە قاتىستى پىكىر ءبىلدىردى، دەپ حابارلايدى Dalanews.kz.
ۆەدومستۆونىڭ مالىمدەۋىنشە، كەڭسەنىڭ اشىلۋى تىكەلەي كومپانيانىڭ ءوز شەشىمىنە بايلانىستى. سونىمەن قاتار مينيسترلىك جەتەكشى تەحنوپارك رەتىندە Astana Hub قاجەتتى ينفراقۇرىلىمدىق قولداۋ كورسەتە الاتىنىن اتاپ ءوتتى.
ەگەر Telegram كەڭسەسى اشىلاتىن بولسا، ونداعى جۇمىس ورىندارىنىڭ سانى كومپانيانىڭ بيزنەس ستراتەگياسىنا ساي انىقتالماق.
“قازاقستان جوعارى بىلىكتى ماماندار مەن باسەكەگە قابىلەتتى ەڭبەك جاعدايلارىن ۇسىنا وتىرىپ، حالىقارالىق IT-كومپانيالار ءۇشىن قولايلى ەكوجۇيە قالىپتاستىرۋدا”، — دەلىنگەن رەسمي حابارلامادا.
ەسكە سالايىق، پاۆەل دۋروۆ تامىزدىڭ 25-ىنە قاراعان ءتۇنى ازەربايجاننان جەكە ۇشاقپەن كەلە جاتقاندا ۇستالدى. 26 تامىزدا پاريج پروكۋراتۋراسى Telegram پلاتفورماسى ارقىلى جاسالعان قىلمىستارعا قاتىستى شىلدە ايىندا قىلمىستىق ءىس قوزعالعانىن حابارلادى.
كەيىن ونىڭ فرانسيا اۋماعىنان شىعا الماي وتىرعانى تۋرالى اقپارات تارادى. ونىڭ ءىسى سوتقا ءبىر جىلدان كەيىن جەتۋى مۇمكىن. بۇل تۋرالى Wired جۋرنالى فرانسۋز پروكۋراتۋراسىنىڭ وكىلى مايليس دە رەككە سىلتەمە جاساپ حابارلادى.
دە رەك بۇل ماسەلە بويىنشا قانداي دا ءبىر بەيبىت كەلىسىم جاساۋعا ءالى ەرتە ەكەنىن اتاپ ءوتتى.
پروكۋروردىڭ ايتۋىنشا، دۋروۆقا وردەر بەرۋ تۋرالى شەشىم پروكۋراتۋرا Telegram-نىڭ قۇقىق قورعاۋ ورگاندارىنىڭ سۇرانىستارىنا جاۋاپ بەرمەي، ءتۇرلى دەپارتامەنتتەگى تەرگەۋلەردىڭ تىعىرىققا تىرەلۋىنە سەبەپ بولعانىن تۇسىنگەننەن كەيىن قابىلداعان. فرانسيا بيلىگى كاسىپكەردىڭ ۇنسىزدىگىن “قىلمىسقا سىبايلاس قاتىسى بار” دەپ تەڭەستىردى.
Libération باسىلىمىنىڭ مالىمەتىنە سۇيەنگەن Wired جۋرنالىنىڭ جازۋىنشا، 2013 جىلدان 2024 جىلعا دەيىنگى ارالىقتا فرانسۋز جاندارمەرياسى Telegram-عا جىبەرىلگەن 2460 رەسمي سۇرانىستىڭ جاۋاپسىز قالعانىن انىقتاعان.
Telegram-نىڭ سىرتقى جانە ۇكىمەتتىك بايلانىستار ءبولىمىن باسقارعان يۋليا كونلي دۋروۆتى پلاتفورمانىڭ ىشىندەگى وقيعالار ءۇشىن جاۋاپتى دەپ ساناۋ قيسىنسىز ەكەنىن مالىمدەدى. ونىڭ پىكىرىنشە، بۇل جاعداي كونتەنت مودەراسياسى سالاسىنداعى مامانداردىڭ تاپشىلىعىمەن بايلانىستى.
