Qyrǵyzstanda ótken VI Dúniejúzilik kóshpendiler oiyndary aiaqtalǵannan keiin jalpy medal esebine qatysty daý týdy. Qazaqstan tarapy ulttyq quramanyń 32 altyn medal jeńip, birinshi oryn alǵanyn málimdedi. Al uiymdastyrýshylar basqa esep usynyp, Qyrǵyzstandy kósh basyna shyǵardy. Keiin daýly kesteler óshirilip, "oiyndarda resmi medal esebi júrgizilmeidi" degen túsinikteme berildi, dep habarlaidy dalanews.kz.
Qazaqstan 32 altyn alǵanyn málimdedi
Qazaqstannyń Týrizm jáne sport ministrliginiń málimetinshe, ulttyq qurama 32 altyn, 20 kúmis jáne 22 qola medal jeńip alǵan. Jalpy júlde sany - 74. Osy esep boiynsha Qazaqstan birinshi, 30 altyn ielengen Qyrǵyzstan ekinshi, jeti altyn alǵan Resei úshinshi orynǵa shyqqan.
Ministrlik bul málimettiń barlyq jarys nátijesi qaita tekserilgennen keiin jariialanǵanyn habarlady. Qazaqstandyq sportshylar aýdaryspaq, jamby atý, qazaq kúresi, armrestling, arqan tartys, toǵyzqumalaq, mangala, dástúrli sadaq atý, báige jáne basqa da ulttyq sport túrlerinen júlde aldy.
Uiymdastyrýshylar Qazaqstandy ekinshi orynǵa qoidy
Alaida Oiyndardy uiymdastyrýshylardyń esebinde Qazaqstannyń kórsetkishi tómen boldy. Qyrǵyzstannyń memlekettik sport agenttigi qorytyndy baspasóz máslihatynda Qyrǵyzstannyń 30 altyn, 29 kúmis jáne 13 qola medal alǵanyn habarlady. Al Qazaqstanǵa 29 altyn, 16 kúmis jáne 19 qola medal jazyldy.
Bul kestede Qyrǵyzstan birinshi, Qazaqstan ekinshi orynǵa qoiylǵan. Resei quramasy jeti altyn medalmen úshinshi orynǵa turaqtaǵan.
Aiyrma úsh altynmen shektelmeidi
Eki taraptyń málimetin salystyrǵanda, aiyrmashylyq tek úsh altyn medalǵa qatysty emes ekeni baiqalady. Qazaqstan ministrligi ulttyq quramada 74 medal bar dese, uiymdastyrýshylar 64 júldeni ǵana eseptegen.
Iaǵni uiymdastyrýshylar usynǵan nusqada Qazaqstannyń úsh altyn, tórt kúmis jáne úsh qola medali joq. Jalpy aiyrma - on medal. Alaida naqty qandai júldelerdiń esepke alynbaǵany jáne oǵan qandai sebep bolǵany resmi túrde túsindirilgen joq.
Daýly kesteler óshirildi
Qyrǵyzstandy birinshi orynǵa shyǵarǵan qorytyndy keste World Nomad Games 2026 jarysynyń resmi Instagram paraqshasynda jariialandy. Áleýmettik jeli qoldanýshylary esepke kúmán keltirip, Qazaqstannyń júldeleri tolyq kórsetilmegenin jaza bastady.
Osydan keiin uiymdastyrýshylar jazbany óshirdi. Biraz ýaqyttan soń keste qaita jariialanyp, keiin taǵy da alynyp tastaldy. Oiyndardyń resmi saityndaǵy jiyntyq esep te qoljetimsiz bolyp qaldy.
Aldymen uiymdastyrýshylar qorytyndy medal kestesi Oiyndar hatshylyǵynyń málimeti tekserilgennen keiin jariialanatynyn habarlaǵan. Alaida keiin Qyrǵyzstan tarapy múlde basqa túsinikteme berdi.
"Medal esebi júrgizilmeidi" degen málimdeme jasaldy
Daýdan keiin Qyrǵyzstannyń memlekettik sport agenttigi Dúniejúzilik kóshpendiler oiyndarynda memleketter arasynda resmi medal jáne jalpykomandalyq esep júrgizilmeitinin málimdedi.
Vedomstvo ókilderi Oiyndardyń negizgi maqsaty elderdi reiting úshin jarystyrý emes, etnosportty damytý, mádeni murany nasihattaý jáne halyqtar arasyndaǵy dostyqty nyǵaitý ekenin aitty. Jarys nátijeleri ár sport túri boiynsha jeke tirkelgenimen, memleketterdiń jalpy reitingi jasalmaityny túsindirildi.
Alaida bul málimdeme uiymdastyrýshylardyń buǵan deiingi áreketine qaishy keledi. Sebebi jarys barysynda da, qorytyndy baspasóz máslihatynda da elderdiń medal sany eseptelip, olardyń oryndary jariialanyp otyrǵan. Qyrǵyzstannyń resmi aqparat agenttigi de jarystyń alǵashqy kúnderinen bastap medal kestesin taratqan.
Úsh altyn toǵyzqumalaqtan túsýi múmkin
Jeli qoldanýshylary Qazaqstannyń esepke alynbaǵan úsh altyn medali toǵyzqumalaq jarysyna qatysty bolýy múmkin ekenin jazdy.
Qazaqstannyń Týrizm jáne sport ministrligi ulttyq quramanyń toǵyzqumalaqtan tórt altyn jáne eki kúmis medal jeńip alǵanyn habarlady. Qyrǵyzstannyń sport agenttigi keiin jariialaǵan nátijeler de Qazaqstannyń tórt sanatta birinshi bolǵanyn rastaidy.
Áielder arasyndaǵy jekelei synda Móldir Serikqyzy, erler arasynda Erasyl Dýtalipov jeńimpaz atandy. Sonymen qatar Qazaqstan áielder jáne erler arasyndaǵy komandalyq esepte de birinshi oryn aldy.
Osyǵan bailanysty úsh altynǵa qatysty aiyrmashylyq toǵyzqumalaqtaǵy jeke jáne komandalyq nátijelerdi ártúrli sanaýdan týyndaýy múmkin. Degenmen bul ázirge boljam ǵana. Uiymdastyrýshylar naqty qai úsh altynnyń esepke alynbaǵanyn resmi túrde aitqan joq.
Jattyqtyrýshy ne deidi?
Toǵyzqumalaqtan Qazaqstan ulttyq quramasynyń jattyqtyrýshysy Ainur Jaqapbaevanyń aitýynsha, jarysta resmi marapattaý rásimi ótip, jeńimpazdarǵa medaldar tabystalǵan. Qazaqstan quramasy jarystyń sońǵy kezeńinde toǵyzqumalaqtan tórt, mangaladan eki altyn jeńip alyp, jalpykomandalyq esepte Qyrǵyzstannan alǵa shyqqan.
Alaida keiin uiymdastyrýshylar jariialaǵan qorytyndy kestede Qazaqstannyń úsh altyn medali esepke alynbai, el quramasynyń kórsetkishi 32-den 29 altynǵa deiin azaitylǵan.
"Resmi marapattaý boldy. Resmi týrnirlik kestede barlyq oryn kórsetilip, sportshylardyń moinyna medaldar taǵyldy. Biz alty altyn aldyq: tórteýin toǵyzqumalaqtan, ekeýin mangaladan jeńip aldyq. Sóitip, resmi komandalyq esepte olardan ozyp kettik. Biraq keiin bizdiń jekelei synda alǵan úsh altynymyzdy esepten alyp tastap, ózderiniń kestesinde Qazaqstannyń medal sanyn 29 dep kórsetti. Al bizdiń esebimiz boiynsha 32 altyn. Shý osydan shyqty", - dedi Ainur Jaqapbaeva.
Jalpy medal sany nelikten sáikes kelmeidi?
Medal sanynyń ártúrli shyǵýyna komandalyq jarystardy esepteý tártibi sebep bolýy múmkin. Máselen, bir tarap komandanyń ár múshesine berilgen medaldy jeke sanasa, ekinshi tarap búkil komandanyń jeńisin bir medal retinde esepteýi múmkin.
Sonymen qatar keibir saiystar Oiyndardyń negizgi medal baǵdarlamasyna engizilmegen nemese sońǵy kúnniń nátijeleri qorytyndy kestege ýaqytynda qosylmaǵan bolýy yqtimal.
Alaida mundai nusqalardyń eshqaisysy resmi túrde rastalmady. Uiymdastyrýshylar qandai sport túrleri jalpy esepke kirgenin jáne komandalyq júldelerdiń qalai sanalǵanyn ashyq túsindirgen joq.
