Qazaqstan dúngender qaýymdastyǵynyń basshysy Hýseı Daýrov bılikti elimizde qylań bergen ksenofobıa men ultshyldyqtyń problemalary men sebepterine úńilip, naqty shara qabyldaýǵa shaqyrdy. Sondaı-aq, ol Qordaı aýdanynda bolǵan oqıǵalar kezinde jergilikti turǵyndardyń bir-birine qalaı kómektesip, qol ushyn bergenin de zor yqylaspen aıtty, dep habarlaıdy Dalanews.kz.
Beıbit zamanda beıkúná adamdardy óltirip ketti, bul qalaı bolǵany, mundaıdyń qazirgi jáne quqyqtyq memleket - Qazaqstanda bolýy múmkin be?
Shynymen de muny uly Abaıdyń, Shoqan Ýálıhanov, Qoja Ahmet Iassaýı, Abylaı han men Qasym han, Tólebı men Qazybek bı syndy danagóı qazaq halqynyń urpaqtary istedi me?
Jeti atasyna deıin jatqa bilip, óz eliniń batyrlary men qaharmandaryn ulyqtaı biletin eldiń be? İİ- dúnıejúzilik soǵys kezinde Keńes Odaǵynyń ártúrli aımaqtarynan evakýasıalanǵan mıllıondaǵan adamdardy óz baýyryna basyp, panalatqan halyq pa muny istegen? Kavkazdan, Edilden jáne Qıyr Shyǵystan deportasıalanǵan júzdegen myń etnıkalyq toptarǵa basyna baspana men aldyna jyly-jumsaǵan usynǵan adamdar ma?.. Joq! Muny qazaqtar jasaǵan joq! Muny ultshyldyq jáne ksenofobıalyq úndeýlerge ıtermelegen bandıtter men qylmyskerler, ońaı aqshaǵa qumar qaraqshylar, túrli-tústi tóńkerister tehnologıasymen jumys isteıtin, bizdiń turaqtylyq pen ultaralyq kelisimdi buzýǵa nıetti arandatýshy - shetelden basqaratyn emıssarlar jasady, dep jazdy Daýrov Facebook-tegi paraqshasynda.
Ol jappaı tártipsizdikter kezinde jergilikti turǵyndardyń bir-birine qalaı qol ushyn bergenin de zor yqylaspen atap ótti.
Al qazaqtar bizdi qutqardy! Fermer Qýanysh birneshe dúngen otbasylaryn úıine ákelip jasyrdy, dárigerler - Aınur, Azamat, Soná jáne basqalar boıyn úreı bılegen, balasy bar ondaǵan otbasyny úıine kirgizdi. Keńes degen qarıa jabyla tóbeleskender arasynan eki jigitti qorǵap alyp shyǵyp, úıine aparyp shaı bergen, aıta berse mundaı faktiler óte kóp, - dedi ol.
Onyń aıtýynsha, qazaqstandyqtardyń kópshiligi ultshyldyq pen ksenofobıa Qazaqstanǵa qaýip tóndiretinin túsinedi. Sondyqtan bılik onyń paıda bolýy men sebepterine tereń úńilip, ol tamyr alyp ketpeı turǵanda túbirine balta shabý kerek. Sondaı-aq, bılik ultshyldyq pen ksenofobıany, qoǵamdy radıkaldandyrýdy joıý men aldyn-alý sharalary týraly oılaný kerek.
Jambyl oblysynyń Qordaı aýdanynda jappaı tártipsizdikter 8 aqpanǵa qaraǵan túni boldy. Resmı málimet boıynsha, 11 adam qaza tapty, 185 adam jaraqat aldy, 39 úı, 20 saýda nysany jáne 47 kólik órtendi
Jambyl oblysynyń jańa ákimi Berdibek Saparbaevtyń aıtýynsha, qazir Qordaıdaǵy jaǵdaı turaqty, tártipke keltirý jumystary áli júrgizilip jatyr.
