Qamaýdaǵy jýrnalist Dýman Muhammedkárimge kirip shyqqan advokaty Ǵalym Nurpeiisov "Respýblika" basylymyna onyń jaǵdaiy týraly aitty. Onyń sózinshe, Taldyqorǵandaǵy tergeý izoliatorynda otyrǵan jýrnalist ózin Almaty oblysyndaǵy Zarechnyi túrmesine aýystyrmaǵanyna narazylyq retinde denesin tilgen, izinshe ashtyq jariialaǵan, - dep habarlaidy Dalanews.kz Azattyqqa siltep.
"Taldyqorǵandaǵy tergeý izoliatorynda Dýman Muhammedkárimdi eki kún sýyq kartserde beton edende jyly kiimsiz ustaǵan" dedi advokat basylymǵa.
Onyń sózinshe, apelliatsiialyq shaǵymy ózgerissiz qaldyrylǵannan keiin Dýman Muhammedkárimdi Almaty oblysyndaǵy Zarechnyi túrmesine jiberýi kerek bolǵan. Sebebi zań boiynsha ol ózi turatyn aimaqta jazasyn óteýi kerek. Alaida advokattyń Azattyqqa aitýynsha, jýrnalisti Taldyqorǵanǵa "qujattardy alǵannan keiin Zarechnyiǵa aýystyramyz" dep "aldap aparyp", kameraǵa japqan. Túrmege aýystyrýdy talap etken kezde kartserge japqan. Osyǵan yzalanǵan jýrnalist denesin tilip, izine ashtyq jariialaǵan.
Advokattyń aitýynsha, Dýman qarsylyq retinde "qoly, ishi jáne tamaǵyn tilip", qabyrǵaǵa "Oian, qazaq" dep qanmen jazǵan.
"Jedel top kelgennen keiin oǵan alǵashqy kómek bergen, alaida kóktamyryn tildi degen faktini tirkeýden bas tartqan. Budan keiin Dýman ashtyq jariialady. Alaida ashtyq faktisin tirkeýden de bas tartqan. Sosyn tergeý izoliatorynyń qatardaǵy qyzmetkerleri ony kameraǵa aýystyrýdy talap ete bastaǵan. Ony kameraǵa aýystyrǵan" dedi advokat.
Onyń sózinshe, munyń bári apelliatsiialyq sot ótkennen keiin qarasha ortasynda Taldyqorǵanda bolǵan.
Advokattyń sózinshe, Dýman Muhammedkárim ashtyq jariialap, óziniń quqyǵy úshin kúresetinin aitqan.
"Ózime qol jumsaiyn dep otyrǵan joqpyn, meniń quqyǵym bar ekenin, zańdy túrde múddem bar ekenin jáne olardyń muny saqtaýǵa mindetti ekenin kez kelgen amalmen jetkizgim keledi" dep advokat jýrnalistiń sózin jetkizedi.
Aita keteiik, Dýman Muhammedkárim «ekstremizmdi qarjylandyrdy» jáne «tyiym salynǵan uiym jumysyna aralasty» degen aiyppen biyl tamyzda jeti jylǵa sottalǵan. Jýrnalistiń ózi aiypqa úzildi-kesildi qarsy.
