قاماۋداعى جۋرناليست دۋمان مۇحاممەدكارىمگە كىرىپ شىققان ادۆوكاتى عالىم نۇرپەيىسوۆ "رەسپۋبليكا" باسىلىمىنا ونىڭ جاعدايى تۋرالى ايتتى. ونىڭ سوزىنشە، تالدىقورعانداعى تەرگەۋ يزولياتورىندا وتىرعان جۋرناليست ءوزىن الماتى وبلىسىنداعى زارەچنىي تۇرمەسىنە اۋىستىرماعانىنا نارازىلىق رەتىندە دەنەسىن تىلگەن، ىزىنشە اشتىق جاريالاعان، - دەپ حابارلايدى Dalanews.kz ازاتتىققا سىلتەپ.
"تالدىقورعانداعى تەرگەۋ يزولياتورىندا دۋمان مۇحاممەدكارىمدى ەكى كۇن سۋىق كارسەردە بەتون ەدەندە جىلى كيىمسىز ۇستاعان" دەدى ادۆوكات باسىلىمعا.
ونىڭ سوزىنشە، اپەللياسيالىق شاعىمى وزگەرىسسىز قالدىرىلعاننان كەيىن دۋمان مۇحاممەدكارىمدى الماتى وبلىسىنداعى زارەچنىي تۇرمەسىنە جىبەرۋى كەرەك بولعان. سەبەبى زاڭ بويىنشا ول ءوزى تۇراتىن ايماقتا جازاسىن وتەۋى كەرەك. الايدا ادۆوكاتتىڭ ازاتتىققا ايتۋىنشا، ءجۋرناليستى تالدىقورعانعا "قۇجاتتاردى العاننان كەيىن زارەچنىيعا اۋىستىرامىز" دەپ "الداپ اپارىپ"، كامەراعا جاپقان. تۇرمەگە اۋىستىرۋدى تالاپ ەتكەن كەزدە كارسەرگە جاپقان. وسىعان ىزالانعان جۋرناليست دەنەسىن ءتىلىپ، ىزىنە اشتىق جاريالاعان.
ادۆوكاتتىڭ ايتۋىنشا، دۋمان قارسىلىق رەتىندە "قولى، ءىشى جانە تاماعىن ءتىلىپ"، قابىرعاعا "ويان، قازاق" دەپ قانمەن جازعان.
"جەدەل توپ كەلگەننەن كەيىن وعان العاشقى كومەك بەرگەن، الايدا كوكتامىرىن ءتىلدى دەگەن فاكتىنى تىركەۋدەن باس تارتقان. بۇدان كەيىن دۋمان اشتىق جاريالادى. الايدا اشتىق فاكتىسىن تىركەۋدەن دە باس تارتقان. سوسىن تەرگەۋ يزولياتورىنىڭ قاتارداعى قىزمەتكەرلەرى ونى كامەراعا اۋىستىرۋدى تالاپ ەتە باستاعان. ونى كامەراعا اۋىستىرعان" دەدى ادۆوكات.
ونىڭ سوزىنشە، مۇنىڭ ءبارى اپەللياسيالىق سوت وتكەننەن كەيىن قاراشا ورتاسىندا تالدىقورعاندا بولعان.
ادۆوكاتتىڭ سوزىنشە، دۋمان مۇحاممەدكارىم اشتىق جاريالاپ، ءوزىنىڭ قۇقىعى ءۇشىن كۇرەسەتىنىن ايتقان.
"وزىمە قول جۇمسايىن دەپ وتىرعان جوقپىن، مەنىڭ قۇقىعىم بار ەكەنىن، زاڭدى تۇردە مۇددەم بار ەكەنىن جانە ولاردىڭ مۇنى ساقتاۋعا مىندەتتى ەكەنىن كەز كەلگەن امالمەن جەتكىزگىم كەلەدى" دەپ ادۆوكات ءجۋرناليستىڭ ءسوزىن جەتكىزەدى.
ايتا كەتەيىك، دۋمان مۇحاممەدكارىم «ەكسترەميزمدى قارجىلاندىردى» جانە «تىيىم سالىنعان ۇيىم جۇمىسىنا ارالاستى» دەگەن ايىپپەن بيىل تامىزدا جەتى جىلعا سوتتالعان. ءجۋرناليستىڭ ءوزى ايىپقا ۇزىلدى-كەسىلدى قارسى.
