Forým barysynda taraptar keń aýqymdy máselelerdi, sonyń ishinde, Qazaqstan men Ózbekstannyń isker toptary men óńirleri arasynda ózara tıimdi jáne praktıkalyq yntymaqtastyqty jolǵa qoıý máselelerin talqylady. Budan basqa, ekonomıkanyń shıkizattyq emes sektorlaryndaǵy ekijaqty ózara is-qımyldy damytýǵa, eki eldiń eksporttyq áleýetin ulǵaıtýǵa nazar aýdaryldy.
Sonymen qatar, forýmda Túrkistan oblysynyń ákimi Janseıit Túımebaev búgingi is-shara Qazaqstan men Ózbekstan arasyndaǵy ózara yntymaqtastyq pen berik baılanystardy, dostyq qarym-qatynasty qalyptastyrýǵa taǵy bir qadam ekenin atap ótti.
– Osy jyldy Prezıdentimiz Qazaqstandaǵy Ózbekstan jyly dep jarıalady. Bul bizdiń halyqtarymyzdyń baýyrlastyq qarym-qatynasyn taǵy da dáleldeıdi. Bizdi Ózbekstanmen tyǵyz kópǵasyrlyq tatý kórshilik túıinderi, mádenıet ortaqtyǵy, dástúr jáne strategıalyq áriptestiktiń kópjyldyq tarıhy baılanystyrady. Sońǵy jyly eki jaqty saýda kólemi 30% - ǵa artyp, 2 mlrd. AQSH dollaryn qurady. Elbasylarymyz osy jylǵy taýar aınalymyn 3 mlrd. AQSH dollaryna deıin ósirip, 2020 jylǵa qaraı munyń kólemin 5 mlrd. AQSH dollaryna jetkizýdi kózdep otyr. Ózderińiz biletindeı, bıyl Memleket basshysynyń Jarlyǵymen Túrkistan oblysy quryldy. Ortalyǵy Túrkistan shahary talaı ǵasyrlar boıy Qazaq handyǵy men búkil túrki áleminiń saıası jáne rýhanı ómiriniń júregi boldy. Qazaqstan Prezıdenti Túrkistannyń damýyna aıryqsha kóńil bóledi. Búginde Túrkistan oblysy– qýatty ekonomıkalyq áleýeti bar qarqyndy damyp kele jatqan aımaq. Óńirdiń iskerlik klımaty jergilikti kásipkerler úshin de, sheteldik ınvestorlar úshin de tartymdy. Túrkistanda "TURKISTAN" arnaıy ekonomıkalyq aımaǵy quryldy. Onda ınvestorlarǵa artyqshylyqtar men jeńildikter qarastyrylǵan. Múmkindikti paıdalana otyryp, Sizderdi bizdiń 1500 jyldyq tarıhy bar ejelgi elordamyz - Túrkistandy jańǵyrtýǵa shaqyramyn. Biz oblysymyzdy damytýǵa baǵyttalǵan kez kelgen jobany jan-jaqty qoldaýǵa ázirmiz. Bul forým tıimdi alańǵa qyzmet etip, jańa iskerlik baılanystardy ornatý úshin jańa serpin beretinine senimdimin! – dedi J.Túımebaev.
Sonymen qatar, aımaq basshysy búgingi tańda Túrkistan oblysynyń ekonomıkasyn damytýdyń negizgi draıveri bolyp tabylatyn úsh basym baǵyt aıqyndalǵanyn atap ótti. Onyń birinshisi – týrızmdi damytý bolsa, ekinshisi – agroónerkásiptik keshendi qoldaý jáne úshinshi basymdyq – logıstıka jáne tranzıttik áleýet bolyp otyr.
Aıta ketý qajet, Qazaqstan men Ózbekstan arasyndaǵy taýar aınalymy 2017 jyly 2 mlrd. AQSH dollaryn qurasa, bul 2016 jylmen salystyrǵanda 31,2% -ǵa ósti. Qazaqstannyń Ózbekstanǵa eksporttaǵan taýary 2017 jyly 1,3 mlrd. AQSH dollaryn qurap, 35%-ǵa ulǵaıdy. Al Ózbekstannan Qazaqstanǵa ımporttalǵan taýarlar kólemi 735,2 mln. AQSH dollaryn qurap, 25,1%-ǵa artty.
Kezdesýge qatysýshylar búgingi forýmnyń tıimdi jáne jemisti yntymaqtastyqtyń jalǵasy bolatynyna senim bildirdi.
Túrkistan oblysy ákiminiń baspasóz qyzmeti
