فورۋم بارىسىندا تاراپتار كەڭ اۋقىمدى ماسەلەلەردى، سونىڭ ىشىندە، قازاقستان مەن وزبەكستاننىڭ ىسكەر توپتارى مەن وڭىرلەرى اراسىندا ءوزارا ءتيىمدى جانە پراكتيكالىق ىنتىماقتاستىقتى جولعا قويۋ ماسەلەلەرىن تالقىلادى. بۇدان باسقا، ەكونوميكانىڭ شيكىزاتتىق ەمەس سەكتورلارىنداعى ەكىجاقتى ءوزارا ءىس-قيمىلدى دامىتۋعا، ەكى ەلدىڭ ەكسپورتتىق الەۋەتىن ۇلعايتۋعا نازار اۋدارىلدى.
سونىمەن قاتار، فورۋمدا تۇركىستان وبلىسىنىڭ اكىمى جانسەيىت تۇيمەبايەۆ بۇگىنگى ءىس-شارا قازاقستان مەن وزبەكستان اراسىنداعى ءوزارا ىنتىماقتاستىق پەن بەرىك بايلانىستاردى، دوستىق قارىم-قاتىناستى قالىپتاستىرۋعا تاعى ءبىر قادام ەكەنىن اتاپ ءوتتى.
– وسى جىلدى پرەزيدەنتىمىز قازاقستانداعى وزبەكستان جىلى دەپ جاريالادى. بۇل ءبىزدىڭ حالىقتارىمىزدىڭ باۋىرلاستىق قارىم-قاتىناسىن تاعى دا دالەلدەيدى. ءبىزدى وزبەكستانمەن تىعىز كوپعاسىرلىق تاتۋ كورشىلىك تۇيىندەرى، مادەنيەت ورتاقتىعى، ءداستۇر جانە ستراتەگيالىق ارىپتەستىكتىڭ كوپجىلدىق تاريحى بايلانىستىرادى. سوڭعى جىلى ەكى جاقتى ساۋدا كولەمى 30% - عا ارتىپ، 2 ملرد. اقش دوللارىن قۇرادى. ەلباسىلارىمىز وسى جىلعى تاۋار اينالىمىن 3 ملرد. اقش دوللارىنا دەيىن ءوسىرىپ، 2020 جىلعا قاراي مۇنىڭ كولەمىن 5 ملرد. اقش دوللارىنا جەتكىزۋدى كوزدەپ وتىر. وزدەرىڭىز بىلەتىندەي، بيىل مەملەكەت باسشىسىنىڭ جارلىعىمەن تۇركىستان وبلىسى قۇرىلدى. ورتالىعى تۇركىستان شاھارى تالاي عاسىرلار بويى قازاق حاندىعى مەن بۇكىل تۇركى الەمىنىڭ ساياسي جانە رۋحاني ءومىرىنىڭ جۇرەگى بولدى. قازاقستان پرەزيدەنتى تۇركىستاننىڭ دامۋىنا ايرىقشا كوڭىل بولەدى. بۇگىندە تۇركىستان وبلىسى– قۋاتتى ەكونوميكالىق الەۋەتى بار قارقىندى دامىپ كەلە جاتقان ايماق. ءوڭىردىڭ ىسكەرلىك كليماتى جەرگىلىكتى كاسىپكەرلەر ءۇشىن دە، شەتەلدىك ينۆەستورلار ءۇشىن دە تارتىمدى. تۇركىستاندا "TURKISTAN" ارنايى ەكونوميكالىق ايماعى قۇرىلدى. وندا ينۆەستورلارعا ارتىقشىلىقتار مەن جەڭىلدىكتەر قاراستىرىلعان. مۇمكىندىكتى پايدالانا وتىرىپ، سىزدەردى ءبىزدىڭ 1500 جىلدىق تاريحى بار ەجەلگى ەلوردامىز - تۇركىستاندى جاڭعىرتۋعا شاقىرامىن. ءبىز وبلىسىمىزدى دامىتۋعا باعىتتالعان كەز كەلگەن جوبانى جان-جاقتى قولداۋعا ءازىرمىز. بۇل فورۋم ءتيىمدى الاڭعا قىزمەت ەتىپ، جاڭا ىسكەرلىك بايلانىستاردى ورناتۋ ءۇشىن جاڭا سەرپىن بەرەتىنىنە سەنىمدىمىن! – دەدى ج.تۇيمەبايەۆ.
سونىمەن قاتار، ايماق باسشىسى بۇگىنگى تاڭدا تۇركىستان وبلىسىنىڭ ەكونوميكاسىن دامىتۋدىڭ نەگىزگى درايۆەرى بولىپ تابىلاتىن ءۇش باسىم باعىت ايقىندالعانىن اتاپ ءوتتى. ونىڭ ءبىرىنشىسى – ءتۋريزمدى دامىتۋ بولسا، ەكىنشىسى – اگروونەركاسىپتىك كەشەندى قولداۋ جانە ءۇشىنشى باسىمدىق – لوگيستيكا جانە ترانزيتتىك الەۋەت بولىپ وتىر.
ايتا كەتۋ قاجەت، قازاقستان مەن وزبەكستان اراسىنداعى تاۋار اينالىمى 2017 جىلى 2 ملرد. اقش دوللارىن قۇراسا، بۇل 2016 جىلمەن سالىستىرعاندا 31،2% -عا ءوستى. قازاقستاننىڭ وزبەكستانعا ەكسپورتتاعان تاۋارى 2017 جىلى 1،3 ملرد. اقش دوللارىن قۇراپ، 35%-عا ۇلعايدى. ال وزبەكستاننان قازاقستانعا يمپورتتالعان تاۋارلار كولەمى 735،2 ملن. اقش دوللارىن قۇراپ، 25،1%-عا ارتتى.
كەزدەسۋگە قاتىسۋشىلار بۇگىنگى فورۋمنىڭ ءتيىمدى جانە جەمىستى ىنتىماقتاستىقتىڭ جالعاسى بولاتىنىنا سەنىم ءبىلدىردى.
تۇركىستان وبلىسى اكىمىنىڭ باسپا ءسوز قىزمەتى
