Dos Kóshim: «Qazaq qoǵamyna qaisar basshy kerek»
– Dos myrza, kúni keshe Nursultan Nazarbaev Prezidenttik ókilettiligin toqtatyp, qyzmetin Q.Toqaevqa tapsyrdy. Sizdiń oiyńyzsha, endigi jerde elimizdegi saiasi oqiǵa qalai órbýi múmkin. Qandai boljamyńyz bar?
– Eger bilik sailaýǵa deiin jańartylǵan «Sailaý zańyn» qabyldap, birinshi kezekte Parlament sailaýyn ótkizip, sodan keiin ǵana Prezident sailaýyn ótkizse, kelesi Prezidenttiń kim ekendigin qudai biledi (sailaýshylardyń kóp qoldaýyn alǵan degen sóz) der edim.
Al eger bilik osy qalpynda qalsa, sailaýdyń zańy ózgermese, «daýysty sanaityndar» – burynǵy biýdjet qyzmetkerlerinen turatyn komissiia músheleri bolsa, kelesi Prezident – biliktiń tańdaǵan adamy bolady dep nyq senimmen aita alamyn.
Onyń ishinde Q. Toqaev ta, D. Nazarbaeva da bar... Moiyndaýymyz kerek, Toqaev myrza joǵarǵy shendilerdiń ishindegi mádenietti, jemqorlyq istermen bylǵanbaǵan, burynǵy Máskeýge, totalitarlyq júiege basqalardai qyzmet etpegen jandardyń biri.
Biraq qazirgi qazaq qoǵamyn basqarýǵa parasat pen bilimmen qatar minez kerek, qaisarlyq pen batyldyq kerek. Óz basym, Qasymjomart myrzanyń boiynan bundai minez kórgen joqpyn.
– Sonda boljam aityp, dolbar jasaý qiyn bolǵany ma?
– Jalpy saiasattanýshylar buǵan deiinde túrli boljamdar aityp keldi ǵoi. Óz basym qazirgi «saiasi júristerge» qaraǵanda sońǵy boljam shyndyqqa jaqyn siiaqty kórinedi, maǵan.
– Sońǵy jyldary qabyldanǵan zańnamalar, saiasi júristerge qarap naqty bir bailam jasaýǵa bolmai ma?
– Ókinishke orai, 30 jyl jasalǵan bilik júiesiniń ózegi – burynǵy Prezidentimiz. Menińshe, onyń saiasi arenadan tolyq, birjola ketýi – kútpegen nátijelerge alyp kelýi múmkin.
Sondyqtan birshama mezgil N.Nazarbaev óziniń bilikke degen yqpalyn joǵaltpaidy, basqa joldarmen (Qaýipsizdik Keńesi, «Nur Otan» partiiasy) óziniń baǵytyn ustap otyrady.
Ekinshiden, kelesi keletin Prezidentterdiń óziniń aldyndaǵy áriptesiniń barlyq isterin joqqa shyǵaryp, keide jazyqty etip shyǵaratynyndary da halyqaralyq tájiribede jii kezdesedi.
Sondyqtan, keibir Prezidentter úshin bilikten birjola ketý – asa qaýipti qadam.
