دوس كٶشٸم: «قازاق قوعامىنا قايسار باسشى كەرەك»
– دوس مىرزا, كٷنٸ كەشە نۇرسۇلتان نازارباەۆ پرەزيدەنتتٸك ٶكٸلەتتٸلٸگٸن توقتاتىپ, قىزمەتٸن ق.توقاەۆقا تاپسىردى. سٸزدٸڭ ويىڭىزشا, ەندٸگٸ جەردە ەلٸمٸزدەگٸ ساياسي وقيعا قالاي ٶربۋٸ مٷمكٸن. قانداي بولجامىڭىز بار?
– ەگەر بيلٸك سايلاۋعا دەيٸن جاڭارتىلعان «سايلاۋ زاڭىن» قابىلداپ, بٸرٸنشٸ كەزەكتە پارلامەنت سايلاۋىن ٶتكٸزٸپ, سودان كەيٸن عانا پرەزيدەنت سايلاۋىن ٶتكٸزسە, كەلەسٸ پرەزيدەنتتٸڭ كٸم ەكەندٸگٸن قۇداي بٸلەدٸ (سايلاۋشىلاردىڭ كٶپ قولداۋىن العان دەگەن سٶز) دەر ەدٸم.
ال ەگەر بيلٸك وسى قالپىندا قالسا, سايلاۋدىڭ زاڭى ٶزگەرمەسە, «داۋىستى سانايتىندار» – بۇرىنعى بيۋدجەت قىزمەتكەرلەرٸنەن تۇراتىن كوميسسييا مٷشەلەرٸ بولسا, كەلەسٸ پرەزيدەنت – بيلٸكتٸڭ تاڭداعان ادامى بولادى دەپ نىق سەنٸممەن ايتا الامىن.
ونىڭ ٸشٸندە ق. توقاەۆ تا, د. نازارباەۆا دا بار... مويىنداۋىمىز كەرەك, توقاەۆ مىرزا جوعارعى شەندٸلەردٸڭ ٸشٸندەگٸ مەدەنيەتتٸ, جەمقورلىق ٸستەرمەن بىلعانباعان, بۇرىنعى مەسكەۋگە, توتاليتارلىق جٷيەگە باسقالارداي قىزمەت ەتپەگەن جانداردىڭ بٸرٸ.
بٸراق قازٸرگٸ قازاق قوعامىن باسقارۋعا پاراسات پەن بٸلٸممەن قاتار مٸنەز كەرەك, قايسارلىق پەن باتىلدىق كەرەك. ٶز باسىم, قاسىمجومارت مىرزانىڭ بويىنان بۇنداي مٸنەز كٶرگەن جوقپىن.
– سوندا بولجام ايتىپ, دولبار جاساۋ قيىن بولعانى ما?
– جالپى ساياساتتانۋشىلار بۇعان دەيٸندە تٷرلٸ بولجامدار ايتىپ كەلدٸ عوي. ٶز باسىم قازٸرگٸ «ساياسي جٷرٸستەرگە» قاراعاندا سوڭعى بولجام شىندىققا جاقىن سيياقتى كٶرٸنەدٸ, ماعان.
– سوڭعى جىلدارى قابىلدانعان زاڭنامالار, ساياسي جٷرٸستەرگە قاراپ ناقتى بٸر بايلام جاساۋعا بولماي ما?
– ٶكٸنٸشكە وراي, 30 جىل جاسالعان بيلٸك جٷيەسٸنٸڭ ٶزەگٸ – بۇرىنعى پرەزيدەنتٸمٸز. مەنٸڭشە, ونىڭ ساياسي ارەنادان تولىق, بٸرجولا كەتۋٸ – كٷتپەگەن نەتيجەلەرگە الىپ كەلۋٸ مٷمكٸن.
سوندىقتان بٸرشاما مەزگٸل ن.نازارباەۆ ٶزٸنٸڭ بيلٸككە دەگەن ىقپالىن جوعالتپايدى, باسقا جولدارمەن (قاۋٸپسٸزدٸك كەڭەسٸ, «نۇر وتان» پارتيياسى) ٶزٸنٸڭ باعىتىن ۇستاپ وتىرادى.
ەكٸنشٸدەن, كەلەسٸ كەلەتٸن پرەزيدەنتتەردٸڭ ٶزٸنٸڭ الدىنداعى ەرٸپتەسٸنٸڭ بارلىق ٸستەرٸن جوققا شىعارىپ, كەيدە جازىقتى ەتٸپ شىعاراتىنىندارى دا حالىقارالىق تەجٸريبەدە جيٸ كەزدەسەدٸ.
سوندىقتان, كەيبٸر پرەزيدەنتتەر ٷشٸن بيلٸكتەن بٸرجولا كەتۋ – اسا قاۋٸپتٸ قادام.
