Mańǵystaý ákimi Nurdáýlet Qilybai dombyrashylardy tórge shyǵarý keregin aityp, qyzmetkerlerine eskertý jasady, dep habarlaidy Dalanews.kz.
Óńir ákimi áýeli dombyrashylarmen amandasyp, artynsha óner adamdary tórde otyrýy keregin aitady.
"Men júrgen jerde, ótinish, jigitter tabaldyryqtyń aldynda otyrmasyn. Bulardyń orny - qasietti sahnanyń tóri. Biz alyp esiktiń aldyna "bailap" qoiamyz. Eger aqshaǵa kelisip kelse jaqsy. Al mynandai forýmdarda qazaqtyń dombyrasynyń orny - tór. Men bar kezde solai bolsyn, ótinish", - deidi óńir ákimi.
Aita keteiik, oqiǵa búgin, 26 qyrkúiekte VIII sailanǵan Mańǵystaý oblysy máslihatynyń kezekti XXII sessiiasynyń aldynda bolǵan. Máslihat depýtattary oblys ákimi Nurdáýlet Qilybaidyń 2025 jyldyń 8 aiyndaǵy óńirdiń áleýmettik-ekonomikalyq damýy týraly esebin tyńdaǵan.
