Ulttyq bank tóraǵasy Timýr Súleimenov dollar baǵamy 400 teńgege deiin túsýi múmkin be degen suraqqa jaýap berdi, dep habarlaidy Dalanews.kz.
Súleimenovtiń aitýynsha, teńge baǵamy erkin qalyptasatyndyqtan, ol eksporttan túsetin tabysqa, suranys pen usynysqa bailanysty ózgerip otyrady. Degenmen qazirgi shynaiy stsenariilerde dollardyń 400 teńgege deiin túsýi qarastyrylmaidy.
«Baǵam erkin ózgeretin jáne eksporttyq túsim, suranys pen usynysqa táýeldi bolǵandyqtan, teoriia júzinde bári múmkin. Biraq biz qarastyryp otyrǵan shynaiy stsenariilerde dollardyń 400 teńge bolýy qarastyrylmaidy», – dedi ol.
Ulttyq bank basshysynyń aitýynsha, dollardyń 400 teńgege deiin túsýi úshin el ekonomikasynyń qurylymy aitarlyqtai ózgerýi kerek.
«Ekonomika men ónerkásip eksport kólemin aitarlyqtai arttyryp, sonymen qatar importty azaityp, tepe-teńdik 400 teńge deńgeiinde qalyptasýy ekitalai. Sondyqtan mundai kórsetkish bizdiń boljamdy stsenariilerimizge engizilmegen», – dedi Súleimenov.
Onyń aitýynsha, qazirgi kezde teńge baǵamy shamamen bir dollar úshin 500 teńge deńgeiinde qalyptasqan.
«Baǵamnyń qubylmalylyǵy 5–7% shamasynda. Biz odan da úlken turaqsyzdyqty baiqap otyrǵan joqpyz. Eger naryqta kúrt aýytqýlar bolsa, biz tiisti sharalardy qabyldaimyz», – dep atap ótti Ulttyq bank tóraǵasy.
Sondai-aq ol teńge baǵamynda jaqyn ýaqytta kúrt ózgerister kútilmeitinin aitty.
«Baǵam naryqtaǵy suranys pen usynystyń teńgerimine bailanysty qalyptasady. Eger qubylmalylyq kúsheise, kúrt aýytqýlardy jumsartý úshin valiýtalyq interventsiialar qoldanamyz», – dep túiindedi Súleimenov.
