Astanada ótken Djennifer Lopestiń kontsertine qatysty naqty qarjy esebi áli daiyn emes. Bul jóninde Ulttyq ekonomika vitse-ministri Baýyrjan Omarbekov Úkimet úiinde ótken baspasóz jiynynda aitty, dep habarlaidy Dalanews.kz.
Álemdik juldyzdyń Astanadaǵy shoýyna 15 myń týrist kelgeni habarlanǵan. Aldyn ala boljam boiynsha, el ekonomikasyna 6,5 mlrd teńge tabys ákelip, 400 mln teńge salyq túsýi tiis bolǵan. Osyǵan bailanysty jýrnalister kontsertten keiin naqty qansha kiris túskenin, onyń tikelei nemese janama salyq túrinde bolǵanyn surady.
“Qazir tek uiymdastyrýshylar usynǵan aldyn ala málimet bar. Tolyq esepke alý úshin ýaqyt qajet. Bul suraqqa Qarjy ministrligi men Týrizm jáne sport ministrligi naqty jaýap bergeni jón”, — dedi Omarbekov.
Eske salaiyq, 1 tamyzda Astana Arenada amerikalyq ánshi Djennifer Lopes óziniń Up All Night atty álemdik týrynyń aiasynda qazaqstandyq kórermender aldynda alǵash ret óner kórsetti.
Djennifer Lopestiń sahnalyq kostiýmderi jaily pikir bildirgen Astana Máslihatynyń depýtaty Sáýle Samidin qoǵamnyń qyzý talqysyna tústi. Ol jaqynda elordada ótken amerikalyq pop-juldyzdyń kontsertine qatysty Threads áleýmettik jelisindegi jazbasynda ánshiniń kiimi tym ashyq bolǵanyn aityp, qazaqstandyqtardyń nazaryn aýdardy.
"Kópshilik JLO-nyń ashyq kiimderine nazar aýdardy. Tipti 16 jastaǵy qyzym Ámirlikterde ánshiniń mádenietti qurmettep, jabyq kiingenin aitty. Árine, biz BAÁ emespiz, ózimizdiń qundylyqtarymyz bar. Biraq bizdiń de mentalitetimiz bar, kei obrazdardy jergilikti aýditoriiaǵa beiimdegeni durys bolar edi. JLO ózindik stili bar juldyz ekeni ras. Biraq bul jaǵdai - jastardyń mundai dúnielerdi qalai qabyldaityny jóninde oilanýǵa sebep", – dep jazdy depýtat.
Alaida onyń bul pikiri áleýmettik jeli qoldanýshylarynyń syn-eskertpesine ulasty. Kópshilik Sáýle Samidinniń eldegi mańyzdy máselelerge emes, ánshiniń kiimine nazar aýdarǵanyn orynsyz dep sanady.
"Qurmetti Sáýle hanym! Máslihat tóraǵasy retinde sizden eldiń shynaiy máselelerine kóńil bólýdi suraimyz: áielderdiń quqyqtaryn qorǵaý, alaiaq qurylys kompaniialarymen kúres, aliment tóleýden jaltarǵan ákelerge qatysty sharalar, jol sapasy men infraqurylymdaǵy jemqorlyq syndy mańyzdy taqyryptar nazardan tys qalmaýǵa tiis", – dep jazdy jeli qoldanýshylary.
