استانادا وتكەن دجەننيفەر لوپەستىڭ كونسەرتىنە قاتىستى ناقتى قارجى ەسەبى ءالى دايىن ەمەس. بۇل جونىندە ۇلتتىق ەكونوميكا ۆيسە-مينيسترى باۋىرجان وماربەكوۆ ۇكىمەت ۇيىندە وتكەن باسپا ءسوز جيىنىندا ايتتى، دەپ حابارلايدى Dalanews.kz.

الەمدىك جۇلدىزدىڭ استاناداعى شوۋىنا 15 مىڭ تۋريست كەلگەنى حابارلانعان. الدىن الا بولجام بويىنشا، ەل ەكونوميكاسىنا 6،5 ملرد تەڭگە تابىس اكەلىپ، 400 ملن تەڭگە سالىق ءتۇسۋى ءتيىس بولعان. وسىعان بايلانىستى جۋرناليستەر كونسەرتتەن كەيىن ناقتى قانشا كىرىس تۇسكەنىن، ونىڭ تىكەلەي نەمەسە جاناما سالىق تۇرىندە بولعانىن سۇرادى.

“ءقازىر تەك ۇيىمداستىرۋشىلار ۇسىنعان الدىن الا مالىمەت بار. تولىق ەسەپكە الۋ ءۇشىن ۋاقىت قاجەت. بۇل سۇراققا قارجى مينيسترلىگى مەن تۋريزم جانە سپورت مينيسترلىگى ناقتى جاۋاپ بەرگەنى ءجون”، — دەدى وماربەكوۆ.

ەسكە سالايىق، 1 تامىزدا استانا ارەنادا امەريكالىق ءانشى دجەننيفەر لوپەس ءوزىنىڭ Up All Night اتتى الەمدىك تۋرىنىڭ اياسىندا قازاقستاندىق كورەرمەندەر الدىندا العاش رەت ونەر كورسەتتى.

دجەننيفەر لوپەستىڭ ساحنالىق كوستيۋمدەرى جايلى پىكىر بىلدىرگەن استانا ءماسليحاتىنىڭ دەپۋتاتى ساۋلە ساميدين قوعامنىڭ قىزۋ تالقىسىنا ءتۇستى. ول جاقىندا ەلوردادا وتكەن امەريكالىق پوپ-جۇلدىزدىڭ كونسەرتىنە قاتىستى Threads الەۋمەتتىك جەلىسىندەگى جازباسىندا ءانشىنىڭ كيىمى تىم اشىق بولعانىن ايتىپ، قازاقستاندىقتاردىڭ نازارىن اۋداردى.

"كوپشىلىك JLO-نىڭ اشىق كيىمدەرىنە نازار اۋداردى. ءتىپتى 16 جاستاعى قىزىم امىرلىكتەردە ءانشىنىڭ مادەنيەتتى قۇرمەتتەپ، جابىق كيىنگەنىن ايتتى. ارينە، ءبىز ءباا ەمەسپىز، ءوزىمىزدىڭ قۇندىلىقتارىمىز بار. ءبىراق ءبىزدىڭ دە مەنتاليتەتىمىز بار، كەي وبرازداردى جەرگىلىكتى اۋديتورياعا بەيىمدەگەنى دۇرىس بولار ەدى. JLO وزىندىك ءستيلى بار جۇلدىز ەكەنى راس. ءبىراق بۇل جاعداي - جاستاردىڭ مۇنداي دۇنيەلەردى قالاي قابىلدايتىنى جونىندە ويلانۋعا سەبەپ"، – دەپ جازدى دەپۋتات.

الايدا ونىڭ بۇل پىكىرى الەۋمەتتىك جەلى قولدانۋشىلارىنىڭ سىن-ەسكەرتپەسىنە ۇلاستى. كوپشىلىك ساۋلە ءساميديننىڭ ەلدەگى ماڭىزدى ماسەلەلەرگە ەمەس، ءانشىنىڭ كيىمىنە نازار اۋدارعانىن ورىنسىز دەپ سانادى.

"قۇرمەتتى ساۋلە حانىم! ءماسليحات ءتوراعاسى رەتىندە سىزدەن ەلدىڭ شىنايى ماسەلەلەرىنە كوڭىل ءبولۋدى سۇرايمىز: ايەلدەردىڭ قۇقىقتارىن قورعاۋ، الاياق قۇرىلىس كومپانيالارىمەن كۇرەس، اليمەنت تولەۋدەن جالتارعان اكەلەرگە قاتىستى شارالار، جول ساپاسى مەن ينفراقۇرىلىمداعى جەمقورلىق سىندى ماڭىزدى تاقىرىپتار نازاردان تىس قالماۋعا ءتيىس"، – دەپ جازدى جەلى قولدانۋشىلارى.