Ulytaý oblysy Qarajal qalasynda mektep oqýshylaryn tasymaldaý kezinde zańbuzýshylyqtar anyqtaldy, dep habarlaidy dalanews.kz.
Prokýratýra júrgizgen tekseris barysynda júrgizýshi kýáliginen aiyrylǵan ári meditsinalyq qarsy kórsetilimderi bar adam mektep avtobýsyn júrgizgeni belgili boldy.
Málimetke súiensek, ol psihonevrologiialyq esepte turǵan (jeńil dárejedegi aqyl-oi kemistigi), bala kezinen múgedektigi bar jáne estý qabileti boiynsha ekinshi toptaǵy múgedek azamat bolǵan. Sonymen qatar, ol sot sheshimimen kólik júrgizý quqyǵynan aiyrylǵany anyqtalǵan.
Soǵan qaramastan, er adam Qarajaldaǵy mektepterdiń birine júrgizýshi bolyp jumysqa qabyldanyp, "PAZ-423470" markaly avtobýspen oqýshylardy tasymaldaǵan.
Prokýratýra mundai jaǵdaida 129 oqýshynyń ómiri men densaýlyǵyna qaýip tóngenin málimdedi. Óitkeni júrgizýshi dybystyq belgilerdi tolyq esti almaǵan jáne joldaǵy tótenshe jaǵdailarǵa der kezinde áreket etý múmkindigi shekteýli bolǵan.
Tekseris barysynda júrgizýshi men bilim berý uiymynyń basshysy arasynda jaqyn týystyq bailanys bary da anyqtalǵan.
Prokýrorlyq qadaǵalaý aktisinen keiin júrgizýshi mektep avtobýsyn basqarýdan shettetilip, jaýapty tulǵalar qatań tártiptik jaýapkershilikke tartyldy.
