Neke AHAJ-da tirkelmei qiylǵan «nikah» úshin din qyzmetkerlerin 5–8 jylǵa deiin bas bostandyǵynan aiyrý kerek, mundai usynysty Májilis depýtaty Murat Ábenov aitty,, dep habarlaidy Dalanews.kz.
Onyń sózinshe, resmi nekesiz dini rásimder áielderdiń konstitýtsiialyq quqyqtaryn óreskel buzyp otyr.
«Men bul máseleni buryn da kótergenmin. Áielderdiń zańdy nekege turý quqyǵyn taptap otyrǵan dini qyzmetkerler jaýapkershilikten tys qalmaýy kerek. Konstitýtsiia qabyldanǵannan keiin men olardyń qylmystyq jaýapkershiligin kúsheitýdi usynamyn», – dedi Ábenov Májilis kýlýarynda.
Depýtattyń aitýynsha, nikah atyn jamylǵan mundai qatynastardyń saldary aýyr.
«Qyzdar ózin zańdy nekede júrgendei sezinedi, biraq shyn máninde quqyqsyz qalady. Balalar dúniege keledi, olar da áleýmettik jáne quqyqtyq turǵyda qorǵalmaǵan», – dedi ol.
Ábenov AHAJ-da tirkelmegen nekeni «ortasha aýyr qylmys» dep baǵalap, oǵan sáikes jaza da qatal bolýy tiis ekenin aitty.
«Eń kemi 5–8 jyl. Bul áiel men balanyń taǵdyryna jaýapsyz qaraǵany úshin», – dedi depýtat.
