Balalarǵa arnalǵan «Aigólek» jýrnaly dini sipattaǵy áńgimelerdi jariialaǵannan keiin qoǵamda qyzý pikirtalas týdyrdy. Atap aitqanda, basylymda jaryq kórgen «Shaitannyń aldamshy 12 sózi», «Tozaq» sekildi materialdar aqyn-jazýshylar tarapynan synǵa alynyp otyr, dep habarlaidy Dalanews.kz
Qalamgerler jýrnaldyń negizgi aýditoriiasy – balalar ekenin eskerip, mundai aýyr ári dini taqyryptardy búldirshinderge arnalǵan basylymda jariialamaý qajet ekenin aitady. Olardyń pikirinshe, paiǵambar, shaitan, ólim men kúná sekildi uǵymdar balanyń psihologiiasyna salmaq salýy múmkin.
Aqyn Dariǵa Nurasheva bul taqyryptardyń bala tanymyna sáikes kelmeitinin atap ótti.
«Bul – balanyń túsinigine aýyr dúnie. Dini taqyrypty adam kámelet jasqa tolǵan soń ózi sanaly túrde tańdaýy kerek», – dedi ol.
«Aigólek» jýrnalynda jariialanǵan dini mazmundaǵy úzindiler áleýmettik jelilerde de keńinen talqylanyp jatyr. Birqatar qalamgerler basylym redaktsiiasynan resmi túsindirme berýdi talap etti.
Óz kezeginde jýrnaldyń bas redaktory Qymbat Ábildáqyzy daýǵa sebep bolǵan materialdardyń professor Myrzakeldi Kemel men Qalamqas Temirbaeva jazǵan «Ónege» kitabynan alynǵanyn málimdedi. Onyń aitýynsha, bul shyǵarmalar balalardy jaqsylyqqa tárbieleý maqsatynda jariialanǵan.
«Qazirgi tańda balalar arasynda qatygezdik pen bir-birine qastandyq jasaý jiilep barady. Jas sanany tyiym arqyly tárbieleýdiń bir joly retinde osy materialdardy usyndyq. Al aitylyp jatqan syndardy kórealmaýshylyq pen jýrnalǵa jazylý naýqany kezinde jasalǵan kedergi dep qabyldaimyn», – dedi bas redaktor.
Degenmen, qoǵamda balalarǵa arnalǵan basylymdarda qandai taqyryptar qamtylýy kerek degen másele áli de ózekti bolyp otyr.
