Depýtattyń kópshiligi adal, taza. Olardy myna júie «syndyryp» tastaǵan - sarapshy
«Máslihat depýtattary biýdjetti bekitetin ákimderdiń jeke kontoryn elestetedi.
Iaǵni, qai deńgeidi alyp qarasań da, zań shyǵarýshy júie halyqtyń muńyn oilaýdan góri, memlekettiń qyzmetshisi tárizdi. Depýtattar ózderin solai sezinedi de. Zań shyǵarý tarmaq, Memlekettiń zań shyǵarýshy organy degen jańsaq pikir qalyptasqan.
Mine, bul burys baǵyt. Ókinishke orai, búgingi depýtattardy solai "tárbielep" qoiǵan», - deidi Sairov.
Onyń oiynsha bar másele – júiede. Júie durys emes.
«Biz naqty depýtat tulǵalar jóninde emes, júie jóninde aityp otyrmyz. Depýtattardyń basym kópshiligi taza, adal, patriot azamattar. Ózimizdiń tanysymyz, bireýimizdiń týysymyz, bizdiń qatardan shyqqan.
Biraq, júieniń ishine kirgende ózgeredi. Júie olardy "syndyryp" tastaidy.
Zań shyǵarǵanda da bizdiń depýtattar, "memleket múddesi" turǵysynan qaraýǵa tyrysady.
Al sol memlekette azamattardyń turatyndyǵyn, azamattarsyz memlekettiń bolmaityndyǵyn, zańnyń azamattarǵa qolaily bolýy kerek ekendigin oilarynan shyǵaryp alady. Másele osynda», – deidi saiasattanýshy.
Onyń pikirinshe depýtattar zań shyǵarǵannyń ózinde azamattarǵa qolailylyq jaǵyn basa oilaýy kerek. Óitkeni, memleket degenimiz azamattar.
«Taǵy bir másele, depýtattar moraldyq bedeli bar, alǵyr bolýlary kerek. Pandemiia kezinde qai halyq qalaýlysy bir áleýmettik initsiativamen shyqty?
Ókinishke orai, joq.
Qazir internet zamany, aqparat kóp. Shetelde depýtattar ár-túrli áleýmettik initsiativamen shyǵyp jatady. Bizde joq. Sondyqtan, qoǵam depýtatqa kermek qaraidy.
Zań shyǵarýshy tarmaqtyń halyq aldynda bedeli bar, yqpaldy tulǵalarmen tolyqsyǵan, óziniń oiyn ashyq jetkizýge qabiletti azamattardan qúralǵany júiege qajet. Eger Parlament myǵym, myqty bolsa, júie ornyqty bolady.
Parlament shyn máninde Ókimetke áser ete alatyn bolsa, ádilettilik printsipteri paida.
Parlament saiasi ár-tarapty bolsa, kóshe stihiiasy saiabyrsynady. Saiasi ásire aǵymdar azaiady.
Halyq óziniń shynaiy qalaýlylarynyń bar ekendigine kóz jetkizgen kezde, júiede turaqtylyq paida bolady. Sondyqtan, Parlamenttiń rólin arttyrý kerek...», – deidi sarapshy.
