Amanat partiiasynyń depýtattary ekinshi deńgeidegi bankterge (EDB) turǵyn úi qurylys jinaq júiesine qatysýǵa múmkindik berýdi suraidy. Qazirgi ýaqytta bul quqyqqa tek Otbasy banki ǵana ie ekeni belgili, dep habarlaidy Dalanews.kz.
Depýtattar uzaq merzimdi ipotekalyq qarjylandyrý naryǵyn qurý kezinde BJZQ qarajatyn paidalaný, sondai-aq paiyzdyq mólsherlemelerdi tómendetý jaiyn da qarastyrý qajet dep sanaidy.
Májilis depýtaty Erbolat Satybaldin rent-to-buy (baspanany keiinnen satyp alý quqyǵymen jalǵa alý) júiesin engizý ideiasyn alǵa tartady.
"Mysaly,ai saiynǵy 200 myń teńge tólemniń 50 myń teńgesi jinaq retinde esepke alynady. Osylaisha, úsh jyl ishinde azamat qarajat jinap qana qoimai, sonymen qatar tólem qabilettiligin de rastaidy. Bul júie, ásirese jastarǵa, jalǵyzbasty analarǵa jáne áleýmettik osal toptaǵy azamattarǵa qolaily bolar edi", - dep atap ótti Satybaldin.
Basqa usynystar arasyna, máselen "jyldam ipoteka" tsifrlyq júiesi de bar. Atap aitqanda, memlekettik organdar men EDB arasynda derekter almasý tetigin qurý, sondai-aq avtokreditteýge uqsas turǵyn úi qaryzdaryn rásimdeý úshin onlain-platformany ainalymǵa engizý.
"Sondai-aq, memlekettik baǵdarlamalardy baspanaǵa muqtaj azamattarǵa baǵyttaý qajet. Sýbsidiialar ekinshi naryq pen investitsiialyq satyp alýlardan tys tek birinshi turǵyn úi naryǵynan baspana satyp alýshylarǵa usynylýy kerek. Jalpy, turǵyn úi saiasaty Óńirlik damý baǵdarlamalarymen tyǵyz bailanysty bolýy tiis, sonda bul kóshi-qon aǵyndaryn teńestirýge jáne óńirlerdi keshendi damytýǵa múmkindik beredi", - dep sózin tolyqtyrady depýtat.
Buǵan deiin ipotekalyq nesie boiynsha jyldyq tiimdi syiaqy mólsherlemesi (JTSM) 25%-dan 20%-ǵa deiin tómendetilgeni habarlanǵan bolatyn.
