Ekologıa, geologıa jáne tabıǵı resýrstar vıse-mınıstri Ahmetjan Pirimqulov partıalyqtardy «Jasyl Qazaqstan» ulttyq jobasyn júzege asyrý jospary týraly habardar etti. Onyń aıtýynsha, sýarý kezindegi sý shyǵynyn qysqartý úshin 401 kanaldy rekonstrýksıalaý jáne taǵy 212-sin sıfrlandyrý josparlanyp otyr.
– Syrdarıa ózeniniń problemalaryn sheshý jáne Aral teńiziniń soltústik bóligin saqtaý jumystaryn jalǵastyramyz. 4 kól – Býrabaı, Shortandy, Qopa, Shalqar qalpyna keltiriledi. Turmystyq qatty qaldyqtardy kádege jaratý úlesi qaldyqtardy energetıkalyq ýtılızasıalaý nysandaryn salý esebinen 18-den 34%-ǵa deıin ósedi. Jalpy, ulttyq jobany iske asyrý arqyly 60 myńǵa jýyq jumys orny ashylady, – dedi vıse-mınıstr.
Vedomstvonyń qaldyqtardy óńdeýge qatysty kemshilikterine Keńes tóraǵasynyń orynbasary, Májilis depýtaty Edil Jańbyrshın nazar aýdardy. Onyń aıtýynsha, kóptegen óńirlerde qoqysty bólek jınaý prosesi jolǵa qoıylmaǵan.
– Bizdegi turmystyq qatty qaldyqtardy jınaý jáne tasymaldaý operatorlary, polıgondardyń ıeleri jáne qaıta óńdeýshi kompanıalar bir-birinen múldem bólek salada jumys istep jatqandaı. Quramynda synaby bar qaldyqtardy jınaýǵa arnalǵan konteınerlerdiń jaǵdaıy she? Kezinde mundaı konteınerler Aqtaýda qoıylyp edi. Biraq olar áldeqashan synǵan. Mundaı qaldyqtar qazir qaıda tasymaldanady, olardy kim joıady? Tek konteıner ornatýmen másele sheshilmeıdi, – dedi Edil Jańbyrshın.
Sonymen qatar, Keńes múshesi, Májilis depýtaty Dúısenbaı Turǵanov Jaıyq ózeniniń jaıyn qozǵady.
– Talqylaýmen aınalysyp kele jatqanymyzǵa 10 jyldan astam ýaqyt boldy. Áli kúnge deıin naqty is-áreket joq. Tek qana zertteý. Jaıyqty erekshe memlekettik mańyzy bar sý nysandarynyń qataryna qosýdy surap bir jyl buryn resmı saýal joldadym, biraq áli kúnge deıin eshteńe jasalmady, – dedi halyq qalaýlysy.
Ekologıa mınıstrligini jumysynyń jabyqtyǵyna «Nur Otan» partıasynyń Batys Qazaqstan oblystyq fılıaly janyndaǵy ekokeńes tóraǵasy Darhan Sarıev nazar aýdardy.
– Qazaqstan-Reseı komısıasynyń Jaıyq boıynsha jumysy jasyryn júrgizilýde. Eshqandaı aqparat joq. Jalpy, bizdegi sýǵa qatysty problemalar – gıdrologıalyq analıtıkanyń álsizdiginiń saldary. Máselen, oblystaǵy jeke kompanıalardyń birinde 18 gıdrologıalyq beket bar, al memlekette búkil óńir boıynsha bar bolǵany 20 ǵana. Olar barlyq negizgi sý nysandaryna jetpeıdi. Jer asty sýlary boıynsha da zertteýlerdiń bar-joǵy túsiniksiz, – dedi Darhan Sarıev.
Óz kezeginde «Nur Otan» partıasy Qaraǵandy oblystyq fılıaly janyndaǵy ekologıalyq keńestiń múshesi Dmıtrıı Kalmykov Ekologıa mınıstrliginiń Qoǵamdyq tyńdaýlar ótkizýdiń jańa erejeleri jobasyn synǵa aldy.
– Qujat tolyqqandy qoǵamdyq tyńdaýlardy ecoportal.kz-te qaralatyn qujattarǵa birjaqty pikir bildirýge aýystyrýdy qarastyrady. Sonymen qatar, munda turǵyndardyń suraq qoıýǵa jáne olarǵa jaýap alýǵa múmkindigi joq. Ýákiletti organ azamattardyń aqparatqa jáne sheshim qabyldaý rásimine qol jetkizý quqyqtary men múmkindikterin edáýir qysqartýdy usynatyny ereje jobasyn taldaýdan anyq kórinedi, – dedi Dmıtrıı Kalmykov.
Otyrys barysynda nurotandyqtar partıanyń óńirlik fılıaldary janyndaǵy Ekologıalyq keńester jumysynyń aralyq qorytyndysyn shyǵardy. Mysaly, Soltústik Qazaqstan oblysynda Aıyrtaý jáne Ǵ.Músirepov atyndaǵy aýdandarda ýran ken oryndaryna qatysty máselelerdiń túıini tarqaýǵa taıaý. Qazirgi ýaqytta aýdandyq ákimdiktermen óńdelgen ýran kenishteri komýnaldyq menshikke qabyldanyp, aýyldyq okrýgter ákimdikteriniń balansyna bekitildi.
Bıyl 100 myńnan astam aǵash otyrǵyzylǵan Qyzylorda oblysynyń ekologıalyq problemalary da óz sheshimin tabýda.
Almaty qalasynda partıa músheleriniń belsendi jumysynyń arqasynda qoqystardy shyǵarý jáne barlyq beı-bereket qoqys oryndary joıyldy. Keńes tóraǵasy Eldos Abaqanov atap ótkendeı, partıanyń saılaýaldy ýádeleri aıasynda Almatyda JEO-2-ni gazǵa kóshirý jáne 1 mln. aǵash otyrǵyzý qarastyrylǵan. Turmystyq qatty qaldyqtardy qaıta óńdeý jáne kádege jaratý úlesi 8-den 14%-ǵa deıin ósti.
Jıyn qorytyndysynda Ekologıa mınıstrligine birqatar usynymdar ázirlendi. Atap aıtqanda, «Jasyl Qazaqstan» ulttyq jobasynyń iske asyrylýyna partıalyq monıtorıńti qamtamasyz etý, qaldyqtardy basqarý salasynda ozyq tehnologıalardy odan ári engizý. Sonymen qatar, Jaıyq ózeniniń problemalaryna qatysty Keńes arnaıy otyrys ótkizedi.
