Májilis depýtaty Qairat Balabiev Premer-ministrdiń orynbasaryna depýtattyq saýal joldap, elimizdegi zeinetkerlerdiń qaryz máselesin kóterdi. Ol zeinetkerlerdiń banktik bereshegin keshirý qajettigin alǵa tartyp, bankrottyq týraly zańnyń durys jumys istemei jatqanyn synǵa aldy, dep habarlaidy Dalanews.kz.
Balabievtiń aitýynsha, qabyldanǵan zań azamattarǵa bankrottyq rásimin jeńildetip, eshqandai aralyq deldaldardyń kómeginsiz ótinish berý múmkindigin qarastyrýy tiis edi. Alaida, zańda kórsetilgendei, qaryz somasy 6 mln 291 myń teńgeden aspaǵan jaǵdaida bankrottyqqa ótinish berýge ruqsat etilgenimen, is júzinde bul mehanizm tiisti deńgeide jumys istemeidi. «E-ótinish» platformasy arqyly jiberilgen ótinishter qabyldanbai, kóptegen zeinetker zeinetaqysynan aiyrylyp otyr.
Zeinetkerlerdiń qarjylyq qiyndyqtary
Depýtattyń aitýynsha, kóptegen zeinetker bankterge bereshek. Sonyń saldarynan olardyń esepshottary buǵattalyp, shetelge shyǵý múmkindikteri shektelgen. Qarjy uiymdarynyń áreketi nátijesinde keibir zeinetkerlerdiń 32 myń teńge kólemindegi zeinetaqysy bank kartasyna túspei jatyp, qaryzdy jabýǵa ketip qalady.
Onyń ústine, zeinetaqy tabys kózi retinde qarastyrylyp, áleýmettik qorǵalǵan esepshot sanatyna jatqyzylmaǵan. Áleýmettik qorǵalǵan esepshottardy tek «Kaspii banki», «Halyq banki» jáne «Tsentr Kredit» bankterinde ashýǵa bolady. Alaida, bul bankterdiń keibir óńirlerde filialdary nemese bankomattary joq. Sonymen qatar, bólimsheleri keńinen taralǵan «Qazposhta» bul tizimge kirmegen. Balabievtiń pikirinshe, mundai sheshim zeinetkerlerdiń qarjylyq jaǵdaiyn qiyndatady.
Mikroqarjy uiymdarynyń áreketi
Depýtat mikroqarjy uiymdarynyń zeinetkerlerge az mólsherde nesie berip, keiinnen ony birneshe esege ósirip, bereshekti shekten tys arttyratynyn da atap ótti. Mundai qarjy uiymdary ýaqytsha kómek kórsetkenimen, adamdardy tyǵyryqqa tirep, nesielik tuzaqqa túsiredi.
Depýtat qandai sharalardy usyndy?
Qairat Balabiev qarjylyq qiyndyqqa tap bolǵan zeinetkerlerdi qorǵaý maqsatynda birqatar usynystar engizdi:
1. Ádilet organdaryna zeinetkerlerdiń zeinetaqy esepshottaryn buǵattaýǵa tyiym salý.
2. Respýblikalyq bazada zeinetkerlerdiń bank aldyndaǵy bereshegin baqylap otyrý.
3. Quzyrly organdarǵa zeinetkerlerdi sotsyz jáne sot arqyly «bankrot» dep taný mehanizmin jeńildetý.
4. Zeinetkerlerdiń qaryzdaryn keshirý.
5. Barlyq ekinshi deńgeili bankter men «Qazposhtanyń» zeinetkerlerge arnalǵan áleýmettik qorǵalǵan esepshottaryn ashý.
Depýtattyń aitýynsha, bul sharalar zeinetkerlerdiń qarjylyq jaǵdaiyn jaqsartyp, olardy qiyndyqtan qutqarýǵa kómektesedi.
