Májilis depýtaty Samat Nurtaza elordadaǵy jeńil relsti kólik (LRT) vagondarynyń ishki kórinisin kórsetti. Ol jańa vagondarǵa videoekskýrsiia jasap, ony TikTok jáne Facebook paraqshasynda jariialaǵan, dep habarlaidy Dalanews.kz.
"Búgin tańerteń biz Astananyń naǵyz vizit kartasyna ainalǵan LRT jobasyn basqarý keńsesine bardyq. Onda LRT basshylyǵy depýtattar toby – Dúisenbai Turǵanov, Pavel Kazantsev, Marat Bashimov, Tatiana Saveleva jáne Snejanna Imashevamen kezdesip, jumys barysy týraly esep berdi", – dep jazdy Nurtaza.
Video barysynda depýtat vagon ishindegi oryndyqtardyń antivandaldyq materialmen qaptalǵanyn aitty. Sonymen qatar, vagon intereri ulttyq naqyshta bezendirilgenin baiqaýǵa bolady: qabyrǵalar men oryndyqtarda qazaqy oiýlar jáne jyly tústi gammalar qoldanylǵan.
Depýtattyń aitýynsha, Astanadaǵy LRT jobasynyń jalpy quny – 1 milliard 880 million dollar. Barlyǵy 18 stantsiia josparlanǵan, olardyń arasy 400 metrden 2 shaqyrymǵa deiin ózgeredi. Ár stantsiiada eskalator men lift bolady.
"Poezdar ár 2-4 minýt saiyn júredi. Qozǵalys ýaqyty – tańǵy 06:00-den túngi 23:00-ge deiin. Alǵashynda táýlik boiy júrý josparlanǵan edi, biraq LRT jelisiniń boiyndaǵy úilerdiń turǵyndary qarsy boldy, sol sebepti qozǵalys ýaqyty shekteledi", – dedi depýtat.
Jolaýshy bileti shamamen 200 teńge bolady dep kútilýde, biraq tarif áli naqty bekitilmegen.
"Vagon sapasy jaqsy. Plastik jumsaq. London nemese Máskeý metrosyndaǵydai qatty plastik emes, jumsaq materialdan jasalǵan. Qurylys alańynda negizinen qytailyq jumysshylar eńbek etip jatyr – injenerler júieni muqiiat tekserip jatyr: qysta esik qatyp qalmai ma, jazda relster maiysyp ketpei me, tótenshe jaǵdaida vagonnyń plastigi synbai ma – osynyń bári tekseriledi. Sodan keiin baryp Qytai tarapy jobaǵa kepildik beredi", – dep jazdy Nurtaza.
Ár poezda qyzmetker-baqylaýshy bolady. Ol poiyzdy basqarmaidy, biraq qaýipsizdik, kómekshi jáne baqylaý qyzmetin atqarady.
Sondai-aq, LRT baǵanalary jarnamaǵa jalǵa berilmek. Ol qarjy temirjol infraqurylymyn ustaýǵa jumsalady.
Eske salaiyq, buǵan deiin LRT vagondaryndaǵy jazý tek qazaq jáne aǵylshyn tilinde ekenin jazǵan edik.
