ءماجىلىس دەپۋتاتى سامات نۇرتازا ەلورداداعى جەڭىل رەلستى كولىك (LRT) ۆاگوندارىنىڭ ىشكى كورىنىسىن كورسەتتى. ول جاڭا ۆاگوندارعا ۆيدەوەكسكۋرسيا جاساپ، ونى TikTok جانە Facebook پاراقشاسىندا جاريالاعان، دەپ حابارلايدى Dalanews.kz.
"بۇگىن تاڭەرتەڭ ءبىز استانانىڭ ناعىز ۆيزيت كارتاسىنا اينالعان LRT جوباسىن باسقارۋ كەڭسەسىنە باردىق. وندا LRT باسشىلىعى دەپۋتاتتار توبى – دۇيسەنباي تۇرعانوۆ، پاۆەل كازانسيەۆ، مارات باشيموۆ، تاتيانا ساۆەليەۆا جانە سنەجاننا يماشيەۆامەن كەزدەسىپ، جۇمىس بارىسى تۋرالى ەسەپ بەردى"، – دەپ جازدى نۇرتازا.
ۆيدەو بارىسىندا دەپۋتات ۆاگون ىشىندەگى ورىندىقتاردىڭ انتيۆاندالدىق ماتەريالمەن قاپتالعانىن ايتتى. سونىمەن قاتار، ۆاگون ينتەرەرى ۇلتتىق ناقىشتا بەزەندىرىلگەنىن بايقاۋعا بولادى: قابىرعالار مەن ورىندىقتاردا قازاقى ويۋلار جانە جىلى ءتۇستى گاممالار قولدانىلعان.
دەپۋتاتتىڭ ايتۋىنشا، استاناداعى LRT جوباسىنىڭ جالپى قۇنى – 1 ميلليارد 880 ميلليون دوللار. بارلىعى 18 ستانسيا جوسپارلانعان، ولاردىڭ اراسى 400 مەتردەن 2 شاقىرىمعا دەيىن وزگەرەدى. ءار ستانسيادا ەسكالاتور مەن ليفت بولادى.
"پوەزدار ءار 2-4 مينۋت سايىن جۇرەدى. قوزعالىس ۋاقىتى – تاڭعى 06:00-دەن تۇنگى 23:00-گە دەيىن. العاشىندا تاۋلىك بويى ءجۇرۋ جوسپارلانعان ەدى، ءبىراق LRT جەلىسىنىڭ بويىنداعى ۇيلەردىڭ تۇرعىندارى قارسى بولدى، سول سەبەپتى قوزعالىس ۋاقىتى شەكتەلەدى"، – دەدى دەپۋتات.
جولاۋشى بيلەتى شامامەن 200 تەڭگە بولادى دەپ كۇتىلۋدە، ءبىراق تاريف ءالى ناقتى بەكىتىلمەگەن.
"ۆاگون ساپاسى جاقسى. پلاستيك جۇمساق. لوندون نەمەسە ماسكەۋ مەتروسىنداعىداي قاتتى پلاستيك ەمەس، جۇمساق ماتەريالدان جاسالعان. قۇرىلىس الاڭىندا نەگىزىنەن قىتايلىق جۇمىسشىلار ەڭبەك ەتىپ جاتىر – ينجەنەرلەر جۇيەنى مۇقيات تەكسەرىپ جاتىر: قىستا ەسىك قاتىپ قالماي ما، جازدا رەلستەر مايىسىپ كەتپەي مە، توتەنشە جاعدايدا ۆاگوننىڭ پلاستيگى سىنباي ما – وسىنىڭ ءبارى تەكسەرىلەدى. سودان كەيىن بارىپ جۇڭگو تاراپى جوباعا كەپىلدىك بەرەدى"، – دەپ جازدى نۇرتازا.
ءار پوەزدا قىزمەتكەر-باقىلاۋشى بولادى. ول پويىزدى باسقارمايدى، ءبىراق قاۋىپسىزدىك، كومەكشى جانە باقىلاۋ قىزمەتىن اتقارادى.
سونداي-اق، LRT باعانالارى جارناماعا جالعا بەرىلمەك. ول قارجى تەمىرجول ينفراقۇرىلىمىن ۇستاۋعا جۇمسالادى.
ەسكە سالايىق، بۇعان دەيىن لرت ۆاگوندارىنداعى جازۋ تەك قازاق جانە اعىلشىن تىلىندە ەكەنىن جازعان ەدىك.
