Májilis depýtaty Irina Smirnova mektepterdegi BJB men TJB júiesin qaita qaraý máselesine pikir bildirdi. Onyń aitýynsha, bul baǵalaý tásilin engizý qate sheshim bolsa, ony engizgen tulǵalar jaýap berýge tiis, dep habarlaidy dalanews.kz.
Buǵan deiin Oqý-aǵartý ministrligi mektepterde BJB men TJB-dan bas tartý múmkindigin qarastyryp jatqanyn habarlaǵan edi. Onyń ornyna burynǵydai baqylaý jumystary engizilýi múmkin. Oqý-aǵartý ministri Juldyz Súleimenova mektepterde diktant, shyǵarma jáne mazmundama siiaqty jumystar qaita engizilip jatqanyn aitqan edi.
Irina Smirnova mundai sheshim qabyldanar aldynda onyń sebepterine jan-jaqty taldaý júrgizilýi qajet dep esepteidi. Onyń sózinshe, jiyntyq baǵalaý júiesin engizýge uzaq ýaqyt pen qomaqty qarajat jumsalǵan.
Depýtat bul másele bir adamnyń sheshimimen emes, saraptamalyq qorytyndylar men qoǵamdyq talqylaýlar negizinde qaralýy kerek ekenin atap ótti.
Sondai-aq, ol keiingi jyldary oqýshylardyń kórkem ádebiet oqýy azaiǵanyn aityp, shyǵarma men mazmundama jazýdyń paidaly ekenin de jetkizdi. Sonymen birge, esse jazý da mańyzdy daǵdy ekenin atap ótti.
"Bir júieden bas tartsaq, onyń sebebi túsindirilýi kerek. Burynǵy sheshim úshin kim jaýap beredi degen suraq ta jaýapsyz qalmaýǵa tiis", - dedi depýtat.
