Májilis depýtaty Ashat Aimaǵambetov Salyq kodeksi boiynsha jaqsy jańalyqty jetkizdi, dep habarlaidy Dalanews.kz.
Depýtattyń sózinshe, jańa Salyq kodeksi boiynsha jumys barysynda birqatar mańyzdy usynys engizgen, onyń birazy birden qoldaý tapqan. Aimaǵambetovtiń aitýynsha, keibiri, ókinishke qarai, jumys tobynyń súzgisinen ótpei qalǵan. Bul kóbine Úkimettiń teris qorytyndysyna bailanysty bolǵan.
"Biraq búgin basynan qorǵap kele jatqan birneshe usynysymyz boiynsha normalardy senatorlar qabyldady. Kaspi men Halyk arqyly aqsha aýdarymdaryna QQS salynbaidy. Eń qyzý talqylanǵan máselelerdiń biri banktik aýdarymdarǵa qosylǵan qun salyǵyn (QQS) engizý boldy. Biz bul bastamaǵa basynan-aq ashyq qarsy boldyq. Óitkeni Kaspi nemese Halyk arqyly qarapaiym aqsha aýdarsań, mysaly balańa túski asqa aýdarsań, osy somaǵa taǵy 16% salyq qosý degen aqylǵa qonbaidy. Bul adamdarǵa da, bankterge de aýyr soqqy bolar edi. Aita ketý kerek, bul máselede Ulttyq bank te naqty jáne berik ustanym tanytty", - dedi ol.
Taǵy bir ózgeris - investitsiiadan túsetin dividendterge jańa salyq salmaý.
"Kelesi másele- investorlardyń dividendterine JTS (jeke tabys salyǵy) salý týraly bastama. Bir jaǵynan memleket halyqty “IPO-ǵa qatysyńdar”, “KEGOC”, “Eir Astana” siiaqty kompaniialardyń aktsiialaryn alyńyzdar dep shaqyryp jatyr. Ekinshi jaǵynan sol aktsiialardan túsken shaǵyn tabysty salyqqa bailap qoimaq. Bul qisynsyz. Biz qarsy boldyq. Qazaqstanda halyqtyń kóbi investitsiiany áli de jyljymaityn múlik arqyly jasaidy. Al búkil álemde baǵaly qaǵazdarǵa investitsiia salý - qalypty tájiribe. Eger bul norma ótkende, jańa bastamasymen aktsiia satyp alyp jatqan adamdardyń ózine bul keri áserin tigizer edi. Endi bul jeńildik saqtalady", - dedi depýtat.
Sonymen qatar, baspa basylymdaryna 10% QQS salý máselesi de bar.
"Biz áriptesim Nartai Sársenǵaliev ekeýmiz birneshe ret usyndyq: otandyq baspa basylymdaryna jeńildikter, QQS mólsherlemesin azaitýdy usyndyq. Bastapqyda bul bastama qoldaý tappaǵan. Biraq búgin Senat ony da qabyldady. Endi baspa ónimderine QQS - tek 10%. Bul degenimiz - mektep gazetterinen bastap, aýdandyq jáne respýblikalyq jýrnaldarǵa deiingi baspa basylymdaryna naqty kómek. Bastapqyda qoldaý tappaǵan birneshe usynysymyz aqyry Senat qabyrǵasynda qoldaý tapty", - dep túiindedi Aimaǵambetov.
