مەجٸلٸس دەپۋتاتى اسحات ايماعامبەتوۆ سالىق كودەكسٸ بويىنشا جاقسى جاڭالىقتى جەتكٸزدٸ, دەپ حابارلايدى Dalanews.kz.
دەپۋتاتتىڭ سٶزٸنشە, جاڭا سالىق كودەكسٸ بويىنشا جۇمىس بارىسىندا بٸرقاتار ماڭىزدى ۇسىنىس ەنگٸزگەن, ونىڭ بٸرازى بٸردەن قولداۋ تاپقان. ايماعامبەتوۆتٸڭ ايتۋىنشا, كەيبٸرٸ, ٶكٸنٸشكە قاراي, جۇمىس توبىنىڭ سٷزگٸسٸنەن ٶتپەي قالعان. بۇل كٶبٸنە ٷكٸمەتتٸڭ تەرٸس قورىتىندىسىنا بايلانىستى بولعان.
"بٸراق بٷگٸن باسىنان قورعاپ كەلە جاتقان بٸرنەشە ۇسىنىسىمىز بويىنشا نورمالاردى سەناتورلار قابىلدادى. Kaspi مەن Halyk ارقىلى اقشا اۋدارىمدارىنا ققس سالىنبايدى. ەڭ قىزۋ تالقىلانعان مەسەلەلەردٸڭ بٸرٸ بانكتٸك اۋدارىمدارعا قوسىلعان قۇن سالىعىن (ققس) ەنگٸزۋ بولدى. بٸز بۇل باستاماعا باسىنان-اق اشىق قارسى بولدىق. ٶيتكەنٸ Kaspi نەمەسە Halyk ارقىلى قاراپايىم اقشا اۋدارساڭ, مىسالى بالاڭا تٷسكٸ اسقا اۋدارساڭ, وسى سوماعا تاعى 16% سالىق قوسۋ دەگەن اقىلعا قونبايدى. بۇل ادامدارعا دا, بانكتەرگە دە اۋىر سوققى بولار ەدٸ. ايتا كەتۋ كەرەك, بۇل مەسەلەدە ۇلتتىق بانك تە ناقتى جەنە بەرٸك ۇستانىم تانىتتى", - دەدٸ ول.
تاعى بٸر ٶزگەرٸس - ينۆەستيتسييادان تٷسەتٸن ديۆيدەندتەرگە جاڭا سالىق سالماۋ.
"كەلەسٸ مەسەلە- ينۆەستورلاردىڭ ديۆيدەندتەرٸنە جتس (جەكە تابىس سالىعى) سالۋ تۋرالى باستاما. بٸر جاعىنان مەملەكەت حالىقتى “IPO-عا قاتىسىڭدار”, “KEGOC”, “ەير استانا” سيياقتى كومپانييالاردىڭ اكتسييالارىن الىڭىزدار دەپ شاقىرىپ جاتىر. ەكٸنشٸ جاعىنان سول اكتسييالاردان تٷسكەن شاعىن تابىستى سالىققا بايلاپ قويماق. بۇل قيسىنسىز. بٸز قارسى بولدىق. قازاقستاندا حالىقتىڭ كٶبٸ ينۆەستيتسييانى ەلٸ دە جىلجىمايتىن مٷلٸك ارقىلى جاسايدى. ال بٷكٸل ەلەمدە باعالى قاعازدارعا ينۆەستيتسييا سالۋ - قالىپتى تەجٸريبە. ەگەر بۇل نورما ٶتكەندە, جاڭا باستاماسىمەن اكتسييا ساتىپ الىپ جاتقان ادامداردىڭ ٶزٸنە بۇل كەرٸ ەسەرٸن تيگٸزەر ەدٸ. ەندٸ بۇل جەڭٸلدٸك ساقتالادى", - دەدٸ دەپۋتات.
سونىمەن قاتار, باسپا باسىلىمدارىنا 10% ققس سالۋ مەسەلەسٸ دە بار.
"بٸز ەرٸپتەسٸم نارتاي سەرسەنعاليەۆ ەكەۋمٸز بٸرنەشە رەت ۇسىندىق: وتاندىق باسپا باسىلىمدارىنا جەڭٸلدٸكتەر, ققس مٶلشەرلەمەسٸن ازايتۋدى ۇسىندىق. باستاپقىدا بۇل باستاما قولداۋ تاپپاعان. بٸراق بٷگٸن سەنات ونى دا قابىلدادى. ەندٸ باسپا ٶنٸمدەرٸنە ققس - تەك 10%. بۇل دەگەنٸمٸز - مەكتەپ گازەتتەرٸنەن باستاپ, اۋداندىق جەنە رەسپۋبليكالىق جۋرنالدارعا دەيٸنگٸ باسپا باسىلىمدارىنا ناقتى كٶمەك. باستاپقىدا قولداۋ تاپپاعان بٸرنەشە ۇسىنىسىمىز اقىرى سەنات قابىرعاسىندا قولداۋ تاپتى", - دەپ تٷيٸندەدٸ ايماعامبەتوۆ.
