Qazaqstannyń depozittik naryǵynda kúrt ózgeris oryn alýda. Kaspi burynǵysha qarqyn alǵanymen, biraq birden birneshe bankte halyq jinaǵynyń kólemi kúrt qysqarǵan. Buǵan ne túrtki? Bul saýalǵa Ranking.kz sarapshylary jaýap berip, atalǵan naryqtaǵy qazirgi ahýaldy egjei-tegjei túsindirdi, dep habarlaidy Dalanews.kz.
Qazaqtandyqtar depozitke qaita bet bura bastady: mamyrdaǵy ósim mardymsyz bolǵanymen, senim artyp keledi.
"2025 jyldyń 1 maýsymdaǵy jaǵdai boiynsha, aldaǵy aimen salystyrǵanda halyqtyń banktegi depozitteri azdap ósip, 25 trln teńgege jetti. Ailyq ósim – bar bolǵany 0,4%. Bul keremet áserge ie nátije bolmasa da, uzaq merzimdi trend turaqty ósimdi kórsetip otyr: sońǵy bes jyldaǵy jyldyq ortasha ósim – 20,5%, al 2025 jyldyń ózinde – 18,9%. Demek, qazaqstandyqtar banktik salymdardy áli de aqshany saqtaý men kóbeitýdiń basty quraly dep esepteidi. Alaida bankterdiń bári birdei oń nátijege qol jetkizbegen. 22 banktyń tek segizi ǵana depozit kólemin arttyrsa, qalǵan 13-inde halyqtyń aqshasy azaiǵan. Jalpy alǵanda, bankten alynǵan aqshanyń jiyntyq kólemi 84,3 mlrd teńgeni quraidy", - deidi sarapshylar.
Onyń sebebi ár bankke qatysty árqalai: biri syiaqylar boiynsha tartymdy jaǵdailardan bas tartsa, taǵy biri ózine degen senimdi joǵalta bastaǵan, sol sekildi bank sektory kóshbasshylarymen qatty básekelese almaý.
Sarapshylar ailyq ósim boiynsha Kaspi Bank-tiń kósh bastap turǵanyn aitady.
Munda mamyr aiynda halyq salymdary 124,5 mlrd teńgege nemese 2,1%-ǵa artqan. Banktegi jalpy salym kólemi 6 trln teńgeden asty.
Ekinshi orynda – Freedom Bank: +23,6 mlrd teńge (680,8 mlrd teńgege deiin).
Úzdik úshtikti Home Credit Bank túiindeidi: +20,5 mlrd teńge, jalpy salymdar somasy 507 mlrd teńgege jetken.
Odan bólek, mamyrda oń dinamika kórsetken banktr qatarynda mynalar jatady:
- Bank TsentrKredit (+12,4 mlrd),
- Eýraziialyq bank (+4 mlrd),
- Otbasy bank (+2,1 mlrd),
- Nurbank (+1,2 mlrd),
- VTB Qazaqstan (+0,8 mlrd).
Bank salymdarynyń ishinde eń tanymaly – merzimdi depozitter (73,1%). Odan keiin jinaqtaýshy depozitter (13,3%) men aǵymdaǵy shottar (13,2%) tur.
Depozitter nege áli de tartymdy?
Birinshiden, halyq tabysynyń artýy. Ásirese, iri qalalarda jumyspen qamtylý jáne jalaqy deńgeii joǵary, artyq qarajatty jinaqtaýǵa múmkindik bar.
Ekinshiden, joǵary paiyzdyq mólsherleme. Ulttyq Banktiń bazalyq mólsherlemesi – 16,5%. Bul – álemdegi eń joǵary kórsetkishterdiń biri. Infliatsiia men mólsherleme arasyndaǵy aitarlyqtai aiyrmashylyq depozittiń tabystylyǵyn kúrt arttyrady.
Úshinshiden, bank sektoryna degen senim nyǵaiyp keledi. Kapitaly osal bankter naryqtan ketken soń, iri oiynshylardyń turaqty ósimi men tsifrlyq transformatsiiasy klientterdiń senimin arttyrýda.
Tórtinshiden, memleket kepildigi. Qazaqstannyń depozitterge kepildik berý qory arqyly barlyq salymdar saqtandyrylǵan, bul da sheshim qabyldaýda mańyzdy ról atqarady.
Besinshiden, tsifrlyq yńǵailylyq. Búginde depozit ashý – birneshe minýttyq sharýa. Bankterdiń mobildi qosymshalary arqyly klientter úiden shyqpai-aq, qarjysyn tiimdi ornalastyra alady.
Buǵan deiin saitymyzda Otbasy bank salymshylarynyń depozitteri endi esepten shyǵarýǵa jáne buǵattaýǵa jatpaitynyn jazǵanbyz.
