Májilis depýtaty Ashat Aimaǵambetov densaýlyq saqtaý salasyndaǵy qarjylandyrý tapshylyǵynyń tereńdei túskenin málimdedi. Onyń aitýynsha, bul másele júiedegi uzyn-sonar kezek pen meditsinalyq qyzmetterdiń sapasyna tikelei áser etip otyr, dep habarlaidy Dalanews.kz.
“Memleket ózderi úshin tóleýge múmkindigi joq 15 sanattaǵy azamattar úshin Qorǵa jarnalardy tóleýge mindetti. Alaida zań boiynsha jarnalar ortasha jalaqy negizinde eseptelýi kerek bolsa da, is júzinde olar medianalyq jalaqy negizinde eseptelip keledi. Sonyń saldarynan tek 2024 jyly meditsinalyq uiymdar 300 mlrd teńgeden qaǵyldy,” – dedi depýtat.
Ol sondai-aq respýblikalyq biýdjet týraly zańnyń buzylýyna toqtalyp, medianalyq jalaqy boiynsha eseptelgen soma tolyq tólenbegenin jetkizdi. Aitýynsha, bul 2024 jyly aýrýhanalardyń taǵy 252 mlrd teńgege qarjylandyrylmaýyna ákelip, jiyntyq qarjylandyrý tapshylyǵy 550 mlrd teńgeden asyp ketken.
“Bul virtýaldy aqsha emes. Bólinbegen qarajat – myńdaǵan operatsiia, reabilitatsiia, dári-dármekter, MRT, KT jáne basqa da ómirlik mańyzdy emdeý sharalaryn quraidy,” – dep atap ótti Aimaǵambetov.
Depýtattyń sózinshe, memleket óz mindettemelerin oryndaýdyń ornyna, azamattarǵa meditsinalyq saqtandyrý qoryna qosymsha jarna tóleýdi usynýda.
“Máseleni sheshý úshin jarnany kóterý emes, zańǵa sáikes biýdjettik mindettemelerdi tolyq oryndaý jetkilikti bolar edi,” – dedi ol.
Ashat Aimaǵambetovtyń pikirinshe, bul tek meditsinalyq qyzmetterdiń qoljetimdiligine ǵana emes, halyqtyń júiege degen senimine de keri áserin tigizedi.
Qańtardyń sońynda ótetin úkimettik saǵatta Densaýlyq saqtaý ministrliginiń esebi tyńdalyp, osy máseleler boiynsha Prezident tapsyrmalarynyń oryndalýy talqylanady.
