Májilis depýtaty Baqytjan Bazarbek ózine qarsy sotqa aryz bergen taraptardyń kim ekenin málimdedi, dep habarlaidy Dalanews.kz.
Onyń aitýynsha, densaýlyq saqtaý salasyndaǵy keibir mekemeler depýtattyń atyna sotqa shaǵym túsirgen. Bul týraly ol Joǵarǵy aýditorlyq palatanyń úkimettik saǵatynda aityp ótti. Sol jiynda depýtat MÁMS júiesindegi kemshilikterge qatysty naqty derekter keltirgen bolatyn.
– Sol málimettermen kelispegen meditsinalyq uiymdardyń biri meni sotqa berdi. Taǵy bir mekeme sotqa deiingi tártippen narazylyǵyn bildirip otyr. Olar ar-namysy men bedeline nuqsan keldi dep sanaidy. Maǵan: «Keshirim sura, áitpese advokat pen saraptama shyǵyndaryn óndirip alamyz» dep talap qoiyp otyr. Men buǵan kelispeimin. Aitqan pikirime olar filologiialyq saraptama júrgizgen eken. Biz de endi óz tarapymyzdan lingvistikalyq qorytyndy alamyz, – dedi depýtat.
Eske salaiyq, buǵan deiin densaýlyq saqtaý salasyndaǵy bylyqty ashqan depýtatqa qysym kórsetilip jatqanyn habarlaǵan edik.
Qazaqstanda atyshýly depýtattyq saýaldarymen tanylǵan Májilis depýtaty Baqytjan Bazarbekke qarsy azamattyq sotqa deiingi shaǵym túsip, oǵan kópshilik aldynda keshirim suraý talaby qoiyldy. Bul týraly jýrnalist ári qoǵam belsendisi Botakóz Omarova málimdedi.
Onyń aitýynsha, bul jaǵdai — tek Bazarbekke emes, eldegi ádildik izdegen kez kelgen belsendi azamatqa jasalǵan qysym.
“Jýrnalist, qoǵam belsendisi nemese halyq qalaýlysy milliardtaǵan aqshanyń qaida ketip jatqanyn zerttep, ashyq aitsa — birden qysymǵa ushyraidy, kiberbýllingke tap bolady, artynan sotqa súireleidi. Bul — óte alańdatatyn signal”, – deidi Omarova.
Máseleniń máni nede?
Jýrnalistiń aitýynsha, 2024 jyldyń qańtar aiynda Baqytjan Bazarbek Densaýlyq saqtaý salasyndaǵy zańbuzýshylyqtardy anyq kórsetken ótkir depýtattyq saýal joldap, onda úsh basty máselege nazar aýdarǵan.
