Bishimbaev isi boiynsha sotta taǵy bir kýáger - jedel járdem qyzmetkeri Nurlan Muhambedenov suraqtarǵa jaýap berip jatyr. Onyń sózinshe, jedel járdem brigadasy qońyraý túskennen keiin 8 minýttyń ishinde kelgen, - dep habarlaidy Dalanews.kz.
Jedel járdemniń kelýine naýqastyń es-tússiz jáne demalmai jatqany sebep bolǵan.
"Qasymda júrgizýshi jáne kómekshi Turlybek boldy. Meiramhanaǵa úsheýimiz kirdik. Meiramhanada bizdi Baijanov kútip alyp, 2-qabattaǵy vip-bólmege kirgizdi. Onymen sóilespedik, birden ekinshi qabatqa kóterildik. Divanda kórpeshe jamylyp jalańash áiel jatty. Birden tekseriske kóshe bastadyq, jerge jatqyzyp, reanimatsiialyq sharalar jasai bastadyq", - deidi jedel járdem qyzmetkeri.
Osy sátte Bishimbaev pen Baijanov sóilesip turǵandyqtan jedel járdem qyzmetkerlerine kedergi jasaǵan. Dáriger olardy bólmeden shyǵyp ketýdi suraǵan.
"Kómekshimnen apparatýrany monitorǵa qosýyn suradym, naýqas bul kezde es-tússiz jatty. Tamyr soǵysy baiqalmady, tynys alý jáne júrek soǵysy toqtap qalǵan. Denesi sýyp ketken, qarashyqtary keńeiip ketken. Jedel járdem kelgenge deiin qaitys bolǵan", - deidi dáriger.
Buǵan deiin Bishimbaev Saltanatqa qandai dárini ne úshin bergenin aitqan bolatyn.
Sonymen qatar,Núkenovanyń aǵasy sotta Bishimbaevqa suraq qoidy.
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Sot otyrystarynda oqiǵa bolǵan kezdiń, dálirek, Bishimbaev Saltanatty shashynan súirep, tepkilegen sumdyq kadrlar kórsetildi.
Al búgin Qýandyq Bishimbaev Saltanat Núkenova qaitys bolǵan túni ne úshin kóripkelge habarlasqanyn túsindirdi. Onyń sózinshe, qaiǵyly oqiǵa bolǵan túni jedel járdem shaqyrýdyń ornyna habarlasqan kóripkel Shymkentte turady.
