Dáýren Abaev: "Túrkistan — bizdiń eldiń etnomádeni brendi"
«Álbette, jyl jemisti boldy, jeńister men jetistikter molshylyq. Qazaqstannyń shejiresi úshin 2018 jyl erekshe este qalary aiqyn. Birinshiden, bizdiń eldiń BUU Qaýipsizdik keńesine tóraǵalyq etýin erekshe atap óter edim. Bul — jahandyq ári geosaiasi kún tártibin belgileitin álemniń eń iri halyqaralyq uiymynyń basty organy. Sonymen birge, bul rette óz Táýelsizdigin bar bolǵany 30 jyldai ýaqyt buryn ǵana alǵan memlekettiń ony basqarý múmkindigine ie bolýy — ilýde bir kezdesetin jaǵdai. Bul neni bildiredi? Bul eń aldymen bizdiń eldiń, Prezidentimizdiń abyroiyn, kópvektorly saiasattyń tiimdi ekenin kórsetedi», — deidi Abaev «Habar» telearnasyndaǵy «Ashyq dialog» baǵdarlamasynda.
Ministrdiń aitýynsha, Qazaqstandaǵy aitýly jańalyqtyń ekinshisi — Shymkent qalasynyń respýblikalyq mańyzǵa ie bolyp, Túrkistan oblysynyń qurylýy bolyp otyr.
«Bul rette Memleket basshysy ýaqtyly ári tiimdi sheshimdi qabyldaǵanyn atap ótý kerek. Bul demografiialyq saiasat turǵysynan da, ekonomikalyq turǵyda da tiimdi sheshim. Aimaqqa investitsiia tartýda da óz paidasyn tigizeri anyq. Túrkistannyń búkil túrki áleminiń rýhani oshaǵynyń biri ekenin umytpaý kerek. Túrkistan — bizdiń eldiń eń tanymal ári etnomádeni brendi. Biz ony ary qarai damytyp, týrister úshin ǵana emes, túrki áleminiń zertteýshileri men tarihshylary úshin de tanymal ete túsýimiz kerek», — deidi Dáýren Abaev.
